Ukrainada tinch aholi orasidagi qurbonlar eng yuqori cho‘qqiga chiqdi – BMT

2025 yil iyun oyida Ukrainada 232 nafar tinch aholi halok bo‘lgan, 1343 nafari yaralangan. Bir oyda halok bo‘lgan va yaralangan tinch aholining umumiy soni 2022 yilning fevralida Rossiyaning keng ko‘lamli bostirib kirishi boshlanganidan beri eng yuqori ko‘rsatkichdir. Bu haqda kecha, 10 iyul kuni BMTning Ukrainadagi Inson huquqlari monitoring missiyasi ma’lum qildi.

Bildirilishicha, bir yil ichida zarbalar soni 10 barobar oshgan. Tinch aholiga zarba berish mamlakatning 27 ta hududidan 17 tasida qayd etilgan. Halok bo‘lgan va yaralangan tinch aholining katta qismi (98%) Kiyev nazorati ostidagi hududda bo‘lgan.

Oxirgi oyda raketa va dron hujumlari soni 2024 yil iyuniga nisbatan 10 baravar ko‘p bo‘ldi. BMT Dnepr, Kiyev va Xarkovga berilgan zarbalarga alohida e’tibor qaratdi.

“Iyun oyi statistikasi bu yil vaziyat yomonlashganini tasdiqladi”, deyiladi BMT bayonotida.

BMT ma’lumotlariga ko‘ra, 2025 yilning birinchi yarmida Ukrainada 6754 nafar tinch aholi halok bo‘lgan yoki yaralangan. Bu 2024 yilning shu davriga nisbatan 54 foizga ko‘pdir.

Umuman olganda, urush boshlanganidan beri BMT missiyasi kamida 13 580 tinch aholining, jumladan 716 bolalarning o‘limini, shuningdek, 34 115 kishi, shu jumladan 2 173 nafari bolalar jarohat olganini qayd etdi.

“Qurbonlar sonining keskin o‘sishiga ta’sir ko‘rsatgan asosiy omillar Rossiya Federatsiyasi tomonidan shaharlarga qarshi kuchli uzoq masofali raketalar va dronlardan foydalanish, bu o‘q-dorilarning vayron qiluvchi kuchini oshirish va hujumlar sonining ko‘payishi bo‘ldi”, deyiladi BMT hisobotida.

Qayd etilishicha, “qisqa masofaga uchuvchi uchuvchisiz samolyotlarning ko‘payishi front chizig‘iga yaqin joylashgan aholi punktlariga halokatli ta’sir ko‘rsatgan”. Birlashgan Millatlar Tashkiloti Xerson va Donetsk viloyatlariga bunday zarbalarni alohida ta’kidladi.