Ukraina Nijniy Novgorodga hujum qildi. Yaralanganlar bor

Ukrainaning uchuvchisiz uchish apparatlari bugun, 23 oktyabr kuni Nijniy Novgorod viloyatidagi turar joy binolariga hujum qildi. Hujum oqibatida 3 kishi yaralandi. Bu haqda viloyat gubernatori Gleb Nikitin taqdim etgan ma’lumotlarga tayanib, RIA Novosti xabar berdi.

Uning so‘zlariga ko‘ra, tunda va ertalab harbiylar viloyat osmonida Ukrainaning 19 ta uchuvchisiz uchish apparatini urib tushirgan.

“Gorodets okrugida uchuvchisiz uchish apparatlari qoldiqlarining tushishi oqibatida uch nafar tinch aholi vakili jarohat oldi. Ular shifoxonaga yotqizildi va tibbiy yordam ko‘rsatilmoqda”, deb yozgan Nikitin Max platformasida.

Bundan tashqari, uning aytishicha, bir nechta turar joy binosi, bitta ta’lim muassasasi va bitta infratuzilma ob’ektiga zarar yetgan. Zarba berilgan joylarda tezkor xizmatlar xodimlari ish boshlagan va yetkazilgan zarar haqidagi ma’lumotlar aniqlashtirilmoqda. Hujum tufayli tumandagi maktablar masofaviy ta’limga o‘tgan.

Eslatib o‘tamiz, 22 oktyabr kuni Ukraina va Rossiya o‘zaro dron va raketa hujumlarini amalga oshirishi oqibatida Ukrainada kamida yetti kishi, Rossiyaning Belgorod viloyatida esa bir kishi halok bo‘lgandi.\

Jasmina Murtazoyeva