Uchquduqda bir nechta do‘konlar yonib ketdi (video)

Kecha, 16 iyun kuni Navoiy viloyatining Uchquduq tumanida joylashgan bir nechta do‘konlar yonib ketdi. Bu haqda viloyat Favqulodda vaziyatlar boshqarmasi xabar berdi.

Ma’lum qilinishicha, soat 18:35 da tumanning “Mustaqillik” MFY Amir Temur ko‘chasida joylashgan “El Baraka Ul Haq” MCHJ hamda “Lider Bazar” YATTga tegishli oziq-ovqat va qurilish mollari savdo do‘konlari hamda omborxonasi yonayotgani to‘g‘risida Navoiy viloyati FVBga xabar kelib tushgan.

Xabarga ko‘ra, qutqaruv bo‘linmalari hodisa joyiga soat 18:38 da yetib borib, soat 19:06 da yong‘in qurshab olingan.

Yong‘in joyiga Uchquduq tumani FVB, NKMK AJ hamda “Navoiyuran” DK OFVBdan jami 6 ta yong‘in-qutqaruv ekipaji jalb etilgan. Yong‘in soat 20:05 da to‘liq bartaraf etilgan.

Yong‘in oqibatida savdo va qurilish mollari do‘konlarining taxminan 300 kvadrat metr maydoni yonib zararlangan, savdo do‘konlarining 2 ming kvadrat metr maydoni yong‘indan saqlab qolingan.

Yong‘in oqibatida tan jarohati olgan fuqarolar to‘g‘risida ma’lumot kelib tushmagan.

Eslatib o‘tamiz, avvalroq Farg‘ona viloyatining Yozyovon tumanida 3 ta avtomobil yonib ketgandi va oqibatda 2 kishi halok bo‘lgandi.