Учқудуқда бир нечта дўконлар ёниб кетди (видео)

Кеча, 16 июнь куни Навоий вилоятининг Учқудуқ туманида жойлашган бир нечта дўконлар ёниб кетди. Бу ҳақда вилоят Фавқулодда вазиятлар бошқармаси хабар берди.

Маълум қилинишича, соат 18:35 да туманнинг “Мустақиллик” МФЙ Амир Темур кўчасида жойлашган “El Baraka Ul Haq” МЧЖ ҳамда “Lider Bazar” ЯТТга тегишли озиқ-овқат ва қурилиш моллари савдо дўконлари ҳамда омборхонаси ёнаётгани тўғрисида Навоий вилояти ФВБга хабар келиб тушган.

Хабарга кўра, қутқарув бўлинмалари ҳодиса жойига соат 18:38 да етиб бориб, соат 19:06 да ёнғин қуршаб олинган.

Ёнғин жойига Учқудуқ тумани ФВБ, НКМК АЖ ҳамда “Навоийуран” ДК ОФВБдан жами 6 та ёнғин-қутқарув экипажи жалб этилган. Ёнғин соат 20:05 да тўлиқ бартараф этилган.

Ёнғин оқибатида савдо ва қурилиш моллари дўконларининг тахминан 300 квадрат метр майдони ёниб зарарланган, савдо дўконларининг 2 минг квадрат метр майдони ёнғиндан сақлаб қолинган.

Ёнғин оқибатида тан жароҳати олган фуқаролар тўғрисида маълумот келиб тушмаган.

Эслатиб ўтамиз, аввалроқ Фарғона вилоятининг Ёзёвон туманида 3 та автомобиль ёниб кетганди ва оқибатда 2 киши ҳалок бўлганди.