Turkiya telekanallariga mitinglardan jonli efir uzatish taqiqlandi

Turkiyada lavozimidan chetlatilgan Istanbul hokimi Ekrem Imomo‘g‘lining hibsga olinishi ortidan o‘tkazilayotgan mitinglarni telekanallarda efirga uzatish taqiqlandi. Bu haqda Turkiya Radio va televideniye oliy kengashi rahbari Abubakir Shahin ogohlantirish bilan chiqdi.

Abubakir Shahin teleradiokompaniyalardan norozilik namoyishlarini jonli efirda uzatishni to‘xtatishni talab qilgan va bunga rioya qilinmasa, litsenziyalar bekor qilinishi bilan tahdid qilgan. Shahinning ta’kidlashicha, namoyishlar yoritilishi “cheklangan” va “xolis” bo‘lishi kerak, shuningdek, u rasmiy ma’lumotlar va hukumat vakillarining tushuntirishlarini o‘z ichiga olishi shart.

Abubakir Shahinning ogohlantirishidan keyin Turkiyaning yetakchi telekanallari mitinglar, norozilik namoyishlari va Istanbul Adliya saroyidan jonli efirni to‘xtatgan. Aynan shu joyda Istanbul hokimi Ekrem Imomo‘g‘liga ehtiyot chorasi belgilangandi.

Xususan, TRT Haber, NTV, CNN Turk kabi telekanallar translyatsiyalarni to‘xtatgan. Hozirgacha sodir bo‘lgan voqealar haqida fotoreportajlar bilan xabarlar berish davom etmoqda, shuningdek, ekspertlarning chiqishlari efirga uzatilmoqda. Ba’zi telekanallar, jumladan, xususiy Halk TV norozilik namoyishlari o‘tayotgan joylardan jonli efirni davom ettirmoqda.

“Politico” nashrining yozishicha, X ijtimoiy tarmog‘i mitinglar fonida ayrim turkiyalik muxolifat faollarining akkauntlarini bloklagan. Nashr ma’lumotlariga ko‘ra, ayrim profillarga faqat Turkiya hududida kirish cheklangan, boshqa mamlakatlarda esa bunday taqiq mavjud emas.

Eslatib o‘tamiz, Ekrem Imomo‘g‘li Istanbul Bosh prokuraturasi tomonidan Istanbul shahar hokimligiga qarshi ochilgan korrupsiya tergovi doirasida hibsga olingan edi. Istanbul Bosh prokuraturasi Imomo‘g‘li va 99 gumonlanuvchiga nisbatan jinoiy tashkilot yetakchisi bo‘lish, jinoiy tashkilotga a’zolik, tovlamachilik, poraxo‘rlik, malakali firibgarlik, shaxsiy ma’lumotlarni qonunga xilof ravishda qo‘lga kiritish va tender savdolarini soxtalashtirish kabi ayblovlar bilan boshlangan tergov ishlarini davom ettirmoqda.

Bosh prokuratura Imomo‘g‘li “qurolli terror tashkilotiga yordam berganligi bo‘yicha kuchli gumon” borligini, ammo uni moliyaviy jinoyatlar uchun hibsga olish qarori allaqachon chiqarilgani sababli, uning yana hibsga olinishi “hozirgi bosqichda zarur emas”ligini bildirdi.

Shuningdek, korrupsiya ishi bo‘yicha hibsga olingan Ekrem Imomo‘g‘li vaqtinchalik chora sifatida o‘z lavozimidan chetlatildi. Keyinroq Turkiya muxolifati – Jumhuriyat xalq partiyasi yetakchisi O‘zg‘ur O‘zel hibsga olingan va lavozimidan chetlatilgan Istanbul hokimi Ekrem Imomo‘g‘lining prezidentlikka nomzod sifatida ilgari surilishi uchun partiya praymerizida deyarli 15 million kishi ovoz berganini bildirdi. Shu tariqa Imomo‘g‘li rasman Turkiya prezidentligiga nomzod bo‘ldi.  

Ekrem Imomo‘g‘lining hibsga olinishi

19 mart kuni tongda Istanbul hokimi va Turkiya Prezidenti Rajab Toyib Erdo‘g‘anning asosiy siyosiy raqibi Ekrem Imomo‘g‘li hamda uning 106 tarafdori hibsga olingandi. Ular Kurd harbiy-siyosiy tashkiloti PKKga ko‘maklashish hamda boshqa noqonuniy harakatlarda ayblanmoqda.

Mazkur voqealar yuzasidan Turkiya Adliya vaziri Yilmaz Tunch tegishli bayonotini e’lon qildi. Uning ma’lum qilishicha, Istanbul Bosh prokuraturasi tomonidan olib borilayotgan tergov harakatlari doirasida 106 nafar gumonlanuvchiga, jumladan, Istanbul shahar hokimiga nisbatan bugun ertalab hibsga olish to‘g‘risida qarorlar chiqarilgan. Bildirilishicha, Istanbul Bosh prokuraturasi tomonidan 2 ta tergov harakatlari olib borilmoqda. Shuningdek, Istanbul Bosh prokuraturasining bayonotidan ma’lum bo‘lishicha, tergov materiallari orasida MASAK (Moliyaviy jinoyatlarni tergov qilish boshqarmasi) hisobotlari, soliq ekspertizasi xulosalari, depozitlar haqida hisobotlar, guvohlarning bayonotlari va boshqa dalillar mavjud.

Turkiya Prezidenti devoni Kommunikatsiyalar boshqarmasi rahbari Faxriddin Altun esa Ekrem Imomo‘g‘li hibsga olingani ortidan davlat rahbariga nisbatan tuhmat va bo‘htonlar aytilayotganini bildirdi. U sud organlarining mustaqilligiga putur yetkazish, shuningdek, Prezident Rajab Toyib Erdo‘g‘anga daxl qilish, mafkuraviy tuhmat harakatlariga qarshi ekanini ma’lum qilgan.

Istanbul shahri talabalari Imomo‘g‘lining hibsga olinishiga qarshi namoyishga chiqdi. Turkiyaning asosiy muxolifatdagi Jumhuriyat xalq partiyasi (JXP) yetakchisi O‘zg‘ur O‘zel 86 millionlik respublika aholisini kelasi yakshanba, 23 mart kuni Istanbul hokimi Ekrem Imomo‘g‘lining hibsga olinishiga qarshi ko‘chalarga chiqishga chaqirdi.  JXP a’zolari o‘zlarining partiyadoshlarining hibsga olinishiga norozilik sifatida minbarga to‘planib, parlament Bosh assambleyasi ishini to‘sib qo‘yishdi.