Tramp maxfiy ma’lumotlarni sizdirayotgan “iflos itlar”ni topishga va’da berdi

AQSH Prezidenti Donald Tramp Eron bo‘yicha maxfiy ma’lumotlarning sizib chiqishida aybdorlarni topishga va ularni o‘z qilmishlari uchun badal to‘lashga majbur qilishga va’da berdi. Bu haqda u o‘zining Truth Social ijtimoiy tarmog‘idagi sahifasida yozib qoldirdi.

Tramp ijtimoiy tarmoqda “The Washington Post” nashrining “Eron haqidagi sizib chiqqan ma’lumotlar Tramp haqida nima deydi?” sarlavhali materialiga javoban yozgan.

“Juda qiziq. Albatta o‘qib chiqish kerak! Sizib chiqarishda davom eting, ey iflos itlar! Sizlarni topganimizda, juda qimmatli badal to‘laysizlar”, deb izohlagan xabarni Amerika yetakchisi.

“The Washington Post” maqolasida aytilishicha, Eronga qarshi harbiy operatsiya boshlanishidan oldin Tramp zarbaning ehtimoliy oqibatlari haqida Milliy razvedka direktori Tulsi Gabbard tomonidan ogohlantirishlar olgan.

Nashr keltirgan “The Wall Street Journal” ma’lumotlariga ko‘ra, fevral oyida Gabbard Trampni hujum sodir etilgan taqdirda Tehron Hormuz bo‘g‘ozini yopib qo‘yishi mumkinligi, bu esa jahon energiya bozorini beqarorlashtirishi mumkinligi haqida ogohlantirgan. WP yozishicha, yuqori martabali harbiylar ham shunga o‘xshash xavotirlarni bildirgan. 

“Vitse-prezident Jey Di Vens, o‘z navbatida, ehtiyotkorona yondashuv va muzokaralar tarafdori bo‘lgan, ularning fikricha, bu urushdan ko‘ra kamroq xarajat talab qilgan”, deyiladi materialda.

WP materiali muallifi, kolumnist Mark Tissenning hisoblashicha, ushbu ogohlantirishlar haqidagi xabarlarni tarqatayotgan nashrlar nizo oqibatlari uchun javobgarlikni Trampning zimmasiga yuklashga urinmoqda. Uning o‘zi esa, aksincha, ma’muriyat ichidagi e’tirozlarga qaramay, Prezidentning zarba berish qarorini Eronning yadro qurolini yaratishiga yo‘l qo‘ymaslikka qaratilgan qadam deb hisoblaydi.

Eron haqidagi material mamlakat rahbariyatining AQSHga dushmanlik haqidagi ko‘p yillik bayonotlariga tayanadi va Vashington Tehronni va u bilan bog‘liq guruhlarni ayblagan deyarli besh o‘n yillik hujumlarni eslatadi. 

“Agar Eron bularning barchasini yadroviy soyabonsiz qilgan bo‘lsa, unga ega bo‘lsa, qanday vayronkorliklar keltirib chiqarishini tasavvur qilib ko‘ring”, deyiladi maqolada.

Muallif, shuningdek, Eron bilan yadro dasturi bo‘yicha uzoq muddatli kelishuvga erishish imkoniyatini shubha ostiga olgan va Trampning Eronga bergan zarbalarini oqlanganini bildirgan. 

“Trampning Eronga hujumi xato emas edi. Bu mening hayotimdagi har qanday Prezident tomonidan tashqi siyosatda qabul qilingan eng jasur qaror bo‘ldi”, deydi jurnalist.

Eslatib o‘tamiz, avvalroq AQSH hukumati Eron bilan urush sababli o‘q-dorilar tanqisligi haqidagi ma’lumotlarning sizib chiqishi ushbu ma’lumotlardan foydalanish huquqiga ega bo‘lgan tor doiradagi shaxslar orasidagi xorijiy razvedka agenti tufayli yuz bergan bo‘lishi mumkinligidan xavotirga tushgani haqida xabar berilgan edi.