Tojikiston va Qirg‘iziston o‘rtasidagi chegara nizolari nihoyasiga yetmoqda

Tojikiston va Qirg‘iziston hukumatlari delegatsiyalarining delimitatsiya va demarkatsiya bo‘yicha topografik ishchi guruhlari umumiy davlat chegarasining qariyb 12 kilometri bo‘yicha kelishuvga erishdi. Bu haqda Tojikiston milliy axborot agentligi “Xovar” xabar berdi.

“Topografik va ishchi guruhlar Tojikiston-Qirg‘iziston davlat chegarasining yana 11,88 kilometri bo‘yicha kelishib oldi”, deyiladi xabarda.

Ma’lum qilinishicha, guruhlar 17-23 dekabr kunlari Bustonda (So‘g‘d viloyati) ish olib borgan, ularning navbatdagi yig‘ilishi Qirg‘izistonda bo‘lib o‘tadi va tomonlar unda davlat chegarasining qolgan uchastkalari demarkatsiyasini aniqlashi kutilmoqda.

Ma’lumot uchun, Tojikiston-Qirg‘iziston chegarasining uzunligi 980 km dan ortiq va Sovet Ittifoqi parchalanganidan keyin o‘nlab bahsli hududlar saqlanib qolgan. Bahsli hududlarning mavjudligi tortishuvlarga, shuningdek, qurolli to‘qnashuvlarga olib kelmoqda. Delimitatsiya bo‘yicha muzokaralar 2002 yilning dekabridan beri davom etyapti.
 
Tomonlar Qirg‘izistonda bo‘lib o‘tadigan navbatdagi uchrashuvda davlat chegarasining qolgan uchastkalarini kesib o‘tishni aniqlashni davom ettirishga kelishib oldilar.

Avvalroq, bu mintaqada tomonlar Milliy xavfsizlik qo‘mitasi rahbarlarining uchrashuvi bo‘lib o‘tgan va Saymo‘min Yatimovning so‘zlariga ko‘ra, u qirg‘izistonlik hamkasbi Qamchibek Tashiyev bilan ikki asosiy masala bo‘yicha delimitatsiya va demarkatsiya bo‘yicha bir qarorga kelgan.

"Bu birinchi navbatda Vorux-Xo‘jai A’lo yo‘liga taalluqli. Biz bu masalani amalda hal qilingan, deb hisoblaymiz. Ikkinchi masala Tojikiston tomonidan Qirg‘iziston hududidagi foydalanilayotgan ob’ektlar haqida. Bu borada muhim qarorga keldik",  degan Yatimov.

Unga ko‘ra, Qirg‘iziston Tojikiston hududidagi o‘zi ishlatayotgan ob’ektlardan foydalanish imkoniyatiga ega bo‘ladi, biroq yerlar Tojikiston nazorati ostida qoladi.

Shu bilan birga, Tojikiston Qirg‘iziston hududida o‘zi ishlatayotgan ob’ektlardan foydalanish imkoniyatiga ega bo‘ladi va yerlar Qirg‘iziston Respublikasi nazoratida qoladi.

Tojikiston va Qirg‘iziston o‘rtasida 970 kilometrdan ortiq umumiy chegara mavjud bo‘lib, uning bir necha yuz kilometri hali belgilanmagan.

Hukumatlararo ishchi guruhlar ikki tomonlama manfaatlar himoyasini hisobga olgan holda qolgan chegarani aniqlash va belgilashga harakat qilmoqda. Tomonlarning uchrashuvi bir-birining hududida navbatma-navbat o‘tkaziladi.

Eslatib o‘tamiz, avvalroq davlatlar 18 km chegara bo‘yicha kelishuvga erishgan edi.