Toshkentda tikuvchilik korxonasida yong‘in chiqdi (video)

Kecha, 27 yanvar kuni Toshkent shahar Uchtepa tumanidagi tikuvchilik korxonasining omborida yong‘in sodir bo‘ldi. Bu haqda Toshkent shahar Favqulodda vaziyatlar boshqarmasi xabar berdi.

Qayd etilishicha, kecha, 27 yanvar kuni soat 21:33 da Uchtepa tumani, “Taqachi” MFY Taqachi ko‘chasida joylashgan tikuvchilik korxonasining omborida yong‘in bo‘layotgani to‘g‘risida Toshkent shahar FVBga xabar tushgan. Yong‘in-qutqaruv ekipajlari aytilgan manzilga soat 21:40 da yetib borib, yong‘in soat 22:22 da qurshab olingan va soat 01:41 da o‘chirilgan.

Bildirilishicha, voqea joyiga Toshkent shahar FVB rahbariyati hamda mac’ul tashkilotlarning vakillari chiqqan. Yong‘in oqibatida halok bo‘lgan va jabrlanganlar yo‘q. Hozirda hodisa sababi va keltirilgan moddiy zarar aniqlanmoqda.

Eslatib o‘tamiz, avvalroq Toshkent shahrining Shayxontohur tumanida joylashgan Tashkent City hududidagi ko‘p qavatli uyda yong‘in sodir bo‘lgan edi.