Toshkentda issiq suv quvuri yorilib ketdi (video)

Toshkent shahridagi “Fayziobod GAI” hududida issiq suv quvuri yorilib ketdi. Bu haqda Mirobod tumani hokimligi matbuot xizmati xabar berdi.

Qayd etilishicha, Toshkent shahrida issiqlik tarmoqlarini gidravlik sinovdan o‘tkazish ishlari davom etmoqda. Ayni holat gidravlik sinov vaqtida “Fayziobod GAI” hududida ro‘y bergan va shu joyning o‘zida barcha choralar ko‘rilgan. Hodisa oqibatida hech kim jabrlanmagan.

“Joriy yilning 20 iyundan 2 avgustgacha Toshkent shahrida issiqlik tarmoqlarining gidravlik sinovlari (mexanik kuch va zichlik uchun yuqori bosim ostida issiqlik tarmoqlarining sinovlari) o‘tkaziladi. Sinovlar davomida issiqlik tarmoqlari quvurlarining shikastlanishi, issiq suv yo‘llar va yo‘laklarga chiqishi mumkin”, deyiladi xabarda. 

Eslatib o‘tamiz, avvalroq Toshkent shahrining Yunusobod tumanida katta suv o‘tkazgich tarmog‘idagi nosozlik sabab ko‘chalarni suv bosgandi.