Toshkentda 2 yuk mashinasi to‘qnashishi oqibatida haydovchi halok bo‘ldi

Kecha, 26 noyabr kuni Toshkent shahrida ikkita yuk mashinasi to‘qnashishi oqibatida haydovchilardan biri voqea joyida halok bo‘ldi. Bu haqda Toshkent shahar IIBB Yo‘l harakati xavfsizligi boshqarmasi xabar berdi.

Qayd etilishicha, soat 20:30 larda Yangihayot tumani 4R21  ko‘chasi Qozog‘iston gilamlari do‘koni qarshisidagi qayrilib olish joyida haydovchi 1982 yilda tug‘ilgan Q.A. boshqaruvidagi yuk transport vositasi va 1987 yilda tug‘ilgan I.Q. boshqaruvidagi Isuzu rusumli transport vositalari to‘qnashishi oqibatida yo‘l-transport hodisasi sodir bo‘lgan.

YTH oqibatida Isuzu yuk transport vositasining haydovchisi voqea joyida vafot etgan.

Mazkur holat yuzasidan Toshkent shahar IIBB Tergov boshqarmasi tomonidan O‘zbekiston Respublikasi Jinoyat kodeksining 266-moddasi ( Transport vositalari harakati yoki ulardan foydalanish xavfsizligi qoidalarini buzish)2-qismi bilan jinoyat ishi qo‘zg‘atilib, dastlabki tergov harakatlari olib borilmoqda.

Eslatib o‘tamiz, avvalroq Toshkent shahrida Zeekr va Onix avtomashinalari yo‘l-transport hodisasi sodir etgandi. YTH oqibatida Onix yo‘lovchisiga tez-tibbiy yordam ko‘rsatilgan.