Toshkent viloyatida bosh mutaxassis, Buxoroda esa arxitektor pora bilan ushlandi

Davlat xavfsizlik xizmati Toshkent viloyatida bosh mutaxassisni, Buxoroda esa arxitektorni pora bilan ushladi. Bu haqda O‘zA xabar berdi.

Toshkent viloyati Qurilish va uy-joy kommunal xo‘jaligi sohasida hududiy nazorat qilish inspeksiyasi bosh mutaxassisi mahalliy tadbirkor tomonidan O‘rtachirchiq tumanida qurilgan 3 qavatli savdo majmuasi binosini foydalanishga qabul qilib berish va boshqa hujjatlarini tegishli tashkilotlarda ishlovchi tanishlari orqali hal qilib berishni va’da qilgan. U evaziga 12 ming AQSH dollari talab qilgan. U so‘ralgan pul mablag‘idan 10 ming AQSH dollarini oldindan olgan vaqtida ushlangan.

Shuningdek, “O‘zbekiston shaharsozlik bo‘yicha loyihalash ilmiy-tadqiqot instituti” arxitektori o‘z xizmat mavqeidan foydalanib, Buxoro Qurilish va uy-joy kommunal xo‘jaligi bosh boshqarmasidagi tanishlari orqali, Buxoro shahrida qurilish faoliyati bilan shug‘ullanuvchi MCHJga tegishli 8 sotix yer maydonida bino-inshootlar qurilishi uchun loyiha-smeta hujjatlarini tayyorlashga yordam berishga 5 ming AQSH dollari talab qilgan. U ham so‘ralgan pul mablag‘ini olgan vaqtida qo‘lga olingan.

Eslatib o‘tamiz, avvalroq, 30 yanvar kuni jinoyat ishlari bo‘yicha Mingbuloq tuman sudining raisi Sh.S. 2 000 AQSH dollari miqdorida pora olayotganida qo‘lga tushgandi.