Sud sobiq prezident ishi bo‘yicha qaror chiqardi

Bugun, 23 oktyabr kuni Bishkek shahar sudi sobiq prezident Almazbek Atamboyevning Qo‘y-Tosh qishlog‘idagi uyida 2019 yilning 7-8 avgust kunlari sodir bo‘lgan Qo‘y-Tosh voqealari bo‘yicha apellyatsiya qarori chiqardi. Bu haqda AKIpress xabar berdi.

Sud jarayoniga sudya Leyla Baydayeva raislik qildi. Sud hay’ati Jogorku Keneshning sobiq deputati Irina Karamushkinaning hukmiga o‘zgartirishlar kiritib, mol-mulki musodara qilingan holda, 8 yilga ozodlikdan mahrum qilish jazosini umumiy rejimdagi koloniyaga o‘tkazish to‘g‘risida qaror chiqardi. Ilgari Birinchi may tuman sudi Karamushkinani 7 yil-u 6 oyga ozodlikdan mahrum qilgan edi.

Qolgan barcha jihatlar bo‘yicha birinchi instansiyaning 2025 yil 3 iyundagi hukmi o‘z kuchida qoldi.

Jumladan, sobiq prezident Almazbek Atamboyev mulki musodara qilinib, davlat mukofotlaridan mahrum etilgan holda, 11 yil-u 6 oy muddatga ozodlikdan mahrum qilindi. Prezident Administratsiyasining sobiq rahbari Farid Niyozov 7 yil 8 oyga ozodlikdan mahrum etildi. Qirg‘iziston Jogorku Keneshining sobiq deputati Ravshan Jeyenbekov 7 yil 8 oyga ozodlikdan mahrum qilish. Atamboyevning tarafdori Farhod Babiyev 5 yil 6 oyga ozodlikdan mahrum etildi.

Atamboyevning hibsga olinishi

Qirg‘izistonga 2011-2017 yillarda rahbarlik qilgan Atamboyev 2019 yil 8 avgust kuni Chuy viloyatining Qo‘y-Tosh qishlog‘idagi qarorgohida deyarli bir kun davom etgan maxsus operatsiya davomida qo‘lga olingan edi. Unga qo‘yilgan barcha ayblovlarni bir necha bor rad etgan sobiq davlat rahbarining tarafdorlari qarshilik ko‘rsatgan va maxsus bo‘linmaning bir zobiti operatsiya davomida halok bo‘lgan. To‘qnashuv vaqtida 100 dan ortiq odam, jumladan, politsiyachilar tibbiy yordam so‘rab murojaat qilgan. 

Sobiq prezident hibsga olinganidan bir necha kun o‘tib, huquq-tartibot idoralari xodimlariga nisbatan zo‘ravonlik qo‘llash, ommaviy tartibsizliklar uyushtirish, qotillik, qotillikka urinish, shuningdek, garovga olishni tashkil etish, Bishkek issiqlik elektr stansiyasini rekonstruksiya qilishdagi korrupsiya, Bishkekdagi “Forum” sanoat guruhi binosi bilan noqonuniy bitim tuzish, Qo‘y-Tosh qishlog‘i va Issiqko‘l viloyatidagi yer uchastkalarini noqonuniy egallab olish ayblovlari qo‘yilgan. 

Sobiq davlat rahbari 2020 yil yozida 11 yilu 2 oyga qamoq jazosiga hukm qilingan edi. Keyinchalik Atamboyevga qo‘yilgan ba’zi ayblovlar olib tashlangan, 2022 yil iyunida esa u 2020 yil oktyabr oyida Bishkekda ommaviy tartibsizliklar uyushtirganlikda ayblanib, oqlangan edi. 

Sud qarori bilan 2023 yil 14 fevralda 3,5 yil tartibli koloniyada o‘tirganidan so‘ng ozodlikka chiqdi va respublikani tark etdi. Sobiq prezident ozodlikka chiqqanidan keyin davolanish uchun Ispaniyaga ketdi. Hozirda ham u Qirg‘izistondan tashqarida.