Суд собиқ президент иши бўйича қарор чиқарди

Бугун, 23 октябрь куни Бишкек шаҳар суди собиқ президент Алмазбек Атамбоевнинг Қўй-Тош қишлоғидаги уйида 2019 йилнинг 7-8 август кунлари содир бўлган Қўй-Тош воқеалари бўйича апелляция қарори чиқарди. Бу ҳақда АКИpress хабар берди.

Суд жараёнига судья Лейла Байдаева раислик қилди. Суд ҳайъати Жогорку Кенешнинг собиқ депутати Ирина Карамушкинанинг ҳукмига ўзгартиришлар киритиб, мол-мулки мусодара қилинган ҳолда, 8 йилга озодликдан маҳрум қилиш жазосини умумий режимдаги колонияга ўтказиш тўғрисида қарор чиқарди. Илгари Биринчи май туман суди Карамушкинани 7 йил-у 6 ойга озодликдан маҳрум қилган эди.

Қолган барча жиҳатлар бўйича биринчи инстанциянинг 2025 йил 3 июндаги ҳукми ўз кучида қолди.

Жумладан, собиқ президент Алмазбек Атамбоев мулки мусодара қилиниб, давлат мукофотларидан маҳрум этилган ҳолда, 11 йил-у 6 ой муддатга озодликдан маҳрум қилинди. Президент Администрациясининг собиқ раҳбари Фарид Ниёзов 7 йил 8 ойга озодликдан маҳрум этилди. Қирғизистон Жогорку Кенешининг собиқ депутати Равшан Жеенбеков 7 йил 8 ойга озодликдан маҳрум қилиш. Атамбоевнинг тарафдори Фарҳод Бабиев 5 йил 6 ойга озодликдан маҳрум этилди.

Атамбоевнинг ҳибсга олиниши

Қирғизистонга 2011-2017 йилларда раҳбарлик қилган Атамбоев 2019 йил 8 август куни Чуй вилоятининг Қўй-Тош қишлоғидаги қароргоҳида деярли бир кун давом этган махсус операция давомида қўлга олинган эди. Унга қўйилган барча айбловларни бир неча бор рад этган собиқ давлат раҳбарининг тарафдорлари қаршилик кўрсатган ва махсус бўлинманинг бир зобити операция давомида ҳалок бўлган. Тўқнашув вақтида 100 дан ортиқ одам, жумладан, полициячилар тиббий ёрдам сўраб мурожаат қилган. 

Собиқ президент ҳибсга олинганидан бир неча кун ўтиб, ҳуқуқ-тартибот идоралари ходимларига нисбатан зўравонлик қўллаш, оммавий тартибсизликлар уюштириш, қотиллик, қотилликка уриниш, шунингдек, гаровга олишни ташкил этиш, Бишкек иссиқлик электр станциясини реконструкция қилишдаги коррупция, Бишкекдаги “Форум” саноат гуруҳи биноси билан ноқонуний битим тузиш, Қўй-Тош қишлоғи ва Иссиқкўл вилоятидаги ер участкаларини ноқонуний эгаллаб олиш айбловлари қўйилган. 

Собиқ давлат раҳбари 2020 йил ёзида 11 йилу 2 ойга қамоқ жазосига ҳукм қилинган эди. Кейинчалик Атамбоевга қўйилган баъзи айбловлар олиб ташланган, 2022 йил июнида эса у 2020 йил октябрь ойида Бишкекда оммавий тартибсизликлар уюштирганликда айбланиб, оқланган эди. 

Суд қарори билан 2023 йил 14 февралда 3,5 йил тартибли колонияда ўтирганидан сўнг озодликка чиқди ва республикани тарк этди. Собиқ президент озодликка чиққанидан кейин даволаниш учун Испанияга кетди. Ҳозирда ҳам у Қирғизистондан ташқарида.