Andijondagi ayanchli YTH qurbonlari soni ortdi

Avvalroq, Andijonda Nexia-3 va “ZIL-130” yuk mashinalari to‘qnashuvida ikki kishi halok bo‘lgani haqida xabar bergan edik. 

Yo‘l-transport hodisasi soat 21:00 larda Andijon viloyati Andijon tumani hududida sodir bo‘lgan. Asaka tumanida yashovchi X.M. Nexia-3 rusumli transport vositasi tezligini me’yoridan oshirib boshqarishi oqibatida, shu yo‘nalishda yo‘lning o‘ng chetida to‘xtab turgan 27 yoshli A.N. boshqaruvidagi “ZIL-130” rusumli yuk avtomashinasiga urilgan.

Natijada ikki kishi voqea joyida halok bo‘lgan, yana ikki nafari shifoxonaga olib ketilgandi.

Ichki ishlar vazirligi huzuridagi Tergov departamentining ma’lum qilishicha, shifoxonaga olib ketilgan Nexia-3 avtomobilining yo‘lovchilari ko‘rsatilgan tibbiy muolajalarga qaramasdan vafot etishgan.

Mazkur holat yuzasidan Andijon viloyati IIB huzuridagi Tergov boshqarmasi tomonidan O‘zbekiston Respublikasi Jinoyat kodeksining 266-moddasi 3-qismi “a” bandi (Odamlar o‘limiga sabab bo‘lgan transport vositasini boshqaruvchi shaxs tomonidan transport vositalari harakati yoki ulardan foydalanish xavfsizligi qoidalarini buzish) bilan jinoyat ishi qo‘zg‘atilgan. Dastlabki tergov harakatlari davom ettirilmoqda.