Serbiya parlamentida deputatlar janjallashdi (video)

Bugun, 4 mart kuni Serbiya parlamentida muxolifat deputatlari pirotexnika vositalaridan foydalangan holda mushtlashdi. Yig‘ilish Xalq majlisining YouTube'dagi kanalida translyatsiya qilindi.

Janjal sessiya boshlanganidan taxminan bir soat o‘tib yuzaga keldi. Deputatlar oliy ta’limni moliyalashtirishni ko‘paytirish to‘g‘risidagi qonunga ovoz berishlari kerak edi. Ammo muxolifat hukmron ko‘pchilik bir vaqtning o‘zida o‘nlab boshqa qarorlarni tasdiqlashni rejalashtirganini aytdi. Ular buni noqonuniy deb atadi, chunki, muxolifatga ko‘ra, birinchi navbatda Bosh vazir Milosh Vuchevich va uning hukumati iste’fosi tasdiqlanishi kerak edi. U 28 yanvar kuni ommaviy norozilik namoyishlari fonida iste’foga chiqishini ma’lum qilgan.

Muxolifat qonunchilari hushtak chalib, qonli xurmo tasviri bilan “Rejim qulashi uchun Serbiya ko‘tarildi!” degan plakatlarni ko‘tarib, minbarga otlana boshladi. Ular o‘z raqiblari bilan mushtlashib, parlament zalida tutunli vositani yoqib, tuxum va suv idishlarini uloqtirishgan.

Ayni paytda muxolifatning yuzlab tarafdorlari parlament binosi oldida miting o‘tkazish uchun to‘plandi.

north_east

Turkiya parlamentida deputatlar mushtlashib ketdi (video)

Hukmron koalitsiyaga yetakchilik qilayotgan Serbiya progressiv partiyasidan parlament spikeri Ana Brnabich muxolifatni “terrorchi to‘da” deb atadi va qurbonlardan biri og‘ir ahvolda ekanini aytdi. “Associated Press” agentligining xabar berishicha, kamida uch qonunchi yaralangan.

Ma’lumot uchun, 2024 yil 1 noyabr kuni Novi Sad shahridagi markaziy temiryo‘l vokzalining yangi ta’mirlangan binosiga beton soyabon qulab tushgandi. Qurbonlar 6 yoshdan 74 yoshgacha bo‘lgan 15 kishi edi. Fojiadan ko‘p o‘tmay Belgradda norozilik namoyishlari boshlandi, vaqt o‘tishi bilan ular Serbiyaning boshqa shaharlariga ham tarqaldi. Ularning ishtirokchilari aybdorlarning jazodan qutulib qolishiga yo‘l qo‘ymaslikka chaqirishdi. Namoyishchilar Novi Sad meri va mamlakat Bosh vaziri Milosh Vuchevichning iste’fosini talab qilishdi.

28 yanvar kuni Vuchevich iste’foga chiqishini e’lon qildi. Uning aytishicha, bu qaror Novi Saddagi fojia, shuningdek, namoyishlar chog‘ida talabalardan birining jarohatlanishi bilan bog‘liq. Serbiya Prezidenti Aleksandr Vuchich namoyishlardan xavotirda emasligini aytdi.