Senat qo‘mitalariga rahbarlar saylandi

Bugun, 19 noyabr kuni Oliy Majlis Senatining birinchi yalpi majlisida O‘zbekiston Respublikasi Oliy Majlisi Senati qo‘mitalari va komissiyasini tuzish masalasi ko‘rib chiqilib, 7 ta qo‘mita va 1 komissiya tuzildi. Shuningdek, 6 ta qo‘mitaga rahbarlar saylandi. Bu haqda Oliy Majlis Senati xabar berdi.

Unga ko‘ra:

• Qutbiddin Nukritdinovich Burxonov – Mudofaa va xavfsizlik masalalari qo‘mitasi raisi;
• Abdulhakim Xushbokovich Eshmuratov – Sud-huquq va korrupsiyaga qarshi kurashish masalalari qo‘mitasi raisi;
• Erkin Fayziyevich Gadoyev – Byudjet va iqtisodiy masalalar qo‘mitasi raisi;
• Baxrom Ismoilovich Abdullayev – Fan, ta’lim va sog‘liqni saqlash masalalari qo‘mitasi raisi;
• Orzigul Mo‘ydinovna Qozixonova – Yoshlar, madaniyat va sport masalalari qo‘mitasi raisi;
• Anvar Mirzaaxmedovich Tuychiyev – Agrar, suv xo‘jaligi masalalari va ekologiya qo‘mitasi raisi etib saylandi.

Shuningdek, Xalqaro munosabatlar, tashqi iqtisodiy aloqalar, xorijiy investitsiyalar va turizm masalalari qo‘mitasi hamda Odob-axloq komissiyasi tuzildi va ularga endilikda rahbarlar saylanadi.

Eslatib o‘tamiz, bugun, 19 noyabr kuni Prezident Shavkat Mirziyoyev tomonidan nomzodi Oliy Majlis Senati Raisi lavozimiga taqdim etilgan Tanzila Norboyeva, uning birinchi o‘rinbosari lavozimiga Sodiq Safoyev, Senat Raisining o‘rinbosari lavozimiga Amanbay Orinbayev senatorlar tomonidan saylangandi.