“Salimboyvachcha” mukofotlandi (video)

O‘zbekistonlik tadbirkor, xalq orasida “Salimboyvachcha” nomi bilan tanilgan Salim Abduvaliyev “Constantinus magnus 2023” xalqaro mukofoti bilan taqdirlandi. Bu haqda u o‘zining Instagram sahifasida ma’lum qildi.

Qayd etilishicha, Salim Abduvaliyev Italiyada sportni rivojlantirishga qo‘shgan ulkan hissasi uchun “Constantinus magnus 2023” nufuzli xalqaro mukofoti bilan taqdirlangan.

Taqdirlash marosimi joriy yilning 14 oktyabr kuni Italiyaning Spello munitsipal saroyida bo‘lib o‘tgan. Ushbu saroyda 333 yilga oid tarixiy ahamiyatga ega bo‘lgan epigrafik hujjat bo‘lgan “Konstantin yozuvi” saqlanadi.

“Constantinus magnus” – erishgan yutuqlari jamiyat, madaniyat va sport rivojiga katta ta’sir ko‘rsatgan taniqli shaxslar va tashkilotlarni taqdirlaydigan xalqaro mukofotdir. Mukofot 2011 yilda Italiyada ta’sis etilgan.

Mukofot nomi nasroniylikni Rim imperiyasining davlat diniga aylantirgan va turli madaniyat va dinlarning tinch-totuv yashashiga ulkan ta’sir ko‘rsatgan tarixiy shaxs Buyuk Konstantin sharafiga berilgan.

Ma’lumot uchun, Salim Abduvaliyev O‘zbekiston Olimpiya qo‘mitasi vitse-prezidenti, O‘zbekiston sport kurashlari assotsiatsiyasi prezidenti ham hisoblanadi. O‘zbekiston Prezidenti Shavkat Mirziyoyev 2021 yilda uni “O‘zbekistonda xizmat ko‘rsatgan sport ustozi” unvoni bilan taqdirlagan.

Eslatib o‘tamiz, Salim Abduvaliyev 2022 yilda Lyudvig Nobel mukofotiga ham sazovor bo‘lgandi.