Rojer Federer Xalqaro Tennis Shon-sharaf zaliga kiritiladi

Shveysariyalik afsonaviy tennischi Rojer Federer Xalqaro Tennis Shon-sharaf zaliga kiritiladi. Bu haqda Xalqaro tennis federatsiyasi matbuot xizmati xabar berdi.  

“Xalqaro Tennis Shon-sharaf zaliga kiritilish va sport tarixidagi ko‘plab buyuk chempionlar bilan birga turish – bu juda katta sharaf. Sport va tengdoshlarim tomonidan shu tarzda tan olinish men uchun katta yutuqdir”,  deydi Federer.

Federer faoliyati davomida 20 ta “Katta dubulg‘a” turnir g‘olibligini qo‘lga kiritgan birinchi erkak tennischi bo‘lgan va 2022 yilda nafaqaga chiqishidan oldin 103 martaba titulga ega bo‘lgan edi. Shuningdek, u 2004–2008 yillar oralig‘ida ketma-ket 237 hafta dunyoning birinchi raqamli tennischisi sifatida reytingda bo‘lgan.

“Faoliyatim davomida men tennis tarixini va mendan oldin kelgan buyuk o‘yinchilarning o‘rnaklarini har doim qadrladim. Kelasi yil avgust oyida Nyu-Portga tashrif buyurib, tennis jamoatchiligi bilan ushbu ajoyib lahzani nishonlashni orziqib kutyapman” , deya qo‘shimcha qildi Federer.

Shveysariyalik tennischi faoliyati davomida ATP reytingida jami 310 hafta eng yuqori pog‘onani egallab, Rafael Nadal va Novak Jokovich bilan erkaklar tennisining “katta uchligi” sifatida uzoq vaqt raqobatlashgan.

Eslatib o‘tamiz, avvalroq Londonning “Chelsi” jamoasi sobiq futbolchisi Eden Azar Premer-liga Shon-sharaf zaliga kiritilgan edi.