Рожер Федерер Халқаро Теннис Шон-шараф залига киритилади

Швейцариялик афсонавий теннисчи Рожер Федерер Халқаро Теннис Шон-шараф залига киритилади. Бу ҳақда Халқаро теннис федерацияси матбуот хизмати хабар берди.  

“Халқаро Теннис Шон-шараф залига киритилиш ва спорт тарихидаги кўплаб буюк чемпионлар билан бирга туриш – бу жуда катта шараф. Спорт ва тенгдошларим томонидан шу тарзда тан олиниш мен учун катта ютуқдир”,  дейди Федерер.

Федерер фаолияти давомида 20 та “Катта дубулға” турнир ғолиблигини қўлга киритган биринчи эркак теннисчи бўлган ва 2022 йилда нафақага чиқишидан олдин 103 мартаба титулга эга бўлган эди. Шунингдек, у 2004–2008 йиллар оралиғида кетма-кет 237 ҳафта дунёнинг биринчи рақамли теннисчиси сифатида рейтингда бўлган.

“Фаолиятим давомида мен теннис тарихини ва мендан олдин келган буюк ўйинчиларнинг ўрнакларини ҳар доим қадрладим. Келаси йил август ойида Нью-Портга ташриф буюриб, теннис жамоатчилиги билан ушбу ажойиб лаҳзани нишонлашни орзиқиб кутяпман” , дея қўшимча қилди Федерер.

Швейцариялик теннисчи фаолияти давомида ATP рейтингида жами 310 ҳафта энг юқори поғонани эгаллаб, Рафаэль Надаль ва Новак Жокович билан эркаклар теннисининг “катта учлиги” сифатида узоқ вақт рақобатлашган.

Эслатиб ўтамиз, аввалроқ Лондоннинг “Челси” жамоаси собиқ футболчиси Эден Азар Премьер-лига Шон-шараф залига киритилган эди.