Rossiyaning G‘arbdagi 300 milliard dollari Ukrainaniki – Ustenko

Rossiya Federatsiyasi Markaziy bankining G‘arbda muzlatilgan mablag‘lari allaqachon Ukraina uchun ajratilgan. Bu haqda Ukraina Prezidenti Vladimir Zelenskiyning iqtisodiy maslahatchisi Oleg Ustenko “Ukraina 24” telekanaliga bergan intervyusida ma’lum qildi.

“Rossiya Federatsiyasi Markaziy bankining G‘arbda muzlatilgan mablag‘lari allaqachon Ukraina uchun ajratilgan. Ularning umumiy qiymati 300 milliard dollardan ortiq”, deydi Ustenko.

Shuningdek, Ukraina Iqtisodiyot vazirligi rahbarining birinchi o‘rinbosari Denis Kudinning ta’kidlashicha, Kiyev G‘arbdagi hamkorlari bilan birgalikda Rossiya Markaziy bankining muzlatilgan 415 milliard dollarini musodara qilish mexanizmini ishlab chiqmoqda.

Avvalroq, AQSH Moliya vazirligi Rossiya Markaziy banki, Milliy farovonlik jamg‘armasi (MFJ) va Rossiya Moliya vazirligi bilan operatsiyalarni taqiqlagani haqida xabar bergan edik. 

Oq uy vakili Rossiya Prezidenti Vladimir Putinning urush uchun yig‘gan mablag‘i 630 mlrd dollarga baholanayotganini aytgan.

Rossiyaning Ukrainaga bosqini

Joriy yilning 21 fevral kuni Rossiya Prezidenti Vladimir Putin Kremlda Ukraina sharqidagi o‘zini mustaqil deb e’lon qilgan Lugansk xalq respublikasi (LXR) va Donetsk xalq respublikasini (DXR) tan olish to‘g‘risidagi farmonni imzoladi. Keyinroq RF respublikalarni shu nomdagi viloyatlar chegaradagi tan olganini ta’kidlab, Ukrainaga qarshi urush xavfini oshirib yubordi.

Putinning favqulodda qarori ortidan AQSH, YeI, Kanada, Avstraliya, Buyuk Britaniya va Yaponiya rasmiylari ham Rossiyaga qarshi sanksiyalar kiritdi.

24 fevral kuni Rossiya Prezidenti Vladimir Putin Ukraina sharqida Donbassda rus harbiylari "maxsus harbiy operatsiya" boshlaganini e’lon qildi va rus qo‘shinlari Ukrainaga hujum boshladi. Putin bu harakatini Ukraina sharqidagi rossiyaparast separatist kuchlar rahbarlari shunday so‘rov yuborgani bilan oqladi.

Buning ortidan Zelenskiy Rossiya fuqarolariga rus tilida murojaat qilib, ukrainlarga “na sovuq, na issiq, na gibrid urush kerak emas”ligini, ukrainlar hujumchilarni kutib olishga tayyorligini bildirdi. Ko‘p o‘tmay Prezident Rossiya bilan diplomatik aloqani uzdi.

Rus qo‘shinlari dastlab Kiyev va Xarkovga raketa hujumi uyushtirdi. Prezident Zelenskiy mamlakatda harbiy holat e’lon qildi. Shuningdek, rasmiy idora rus qo‘shinlari Xarkov va Odessa viloyatiga kirib borganini bildirdi.

Hujum boshlanganidan ko‘p o‘tmay, LXR Ichki ishlar vaziri maslahatchisi Vitaliy Kiselev Schaste va Stanitsa shaharchalari LXR nazoratiga o‘tganini e’lon qildi.

Ukrainaga hujum boshlanishi Rossiya iqtisodiga og‘ir zarba berdi. Rus kompaniyalari aksiyalari keskin arzonlashdi, Moskva birjasida savdolar mislsiz darajada pasayish bilan o‘tdi. Gazprom, LUKOYL va boshqa yirik kompaniyalar yo‘qotishlarga uchradi.

25 fevral kuni Zelenskiy Ukrainada umumiy harbiy safarbarlik e’lon qildi. Armiyaga chaqiruv mamlakatning qator viloyat va shaharlarida amalga oshirilishi belgilandi.