Rossiya Serbiyani davlat to‘ntarishiga tayyorgarlikdan ogohlantirdi – Vuchich 

Rossiya Serbiya rahbariyatini respublikada G‘arb davlatlari vakillari tomonidan uyushtirilayotgan ommaviy tartibsizliklar haqida ogohlantirdi. Bu haqda Serbiya Prezidenti Aleksandr Vuchich ma’lum qildi.

"Bugun biz Rossiya Federatsiyasidan rasmiy ma’lumot oldik. Ma’lumotlar rasmiy kanallar orqali olingan, biz u bilan shug‘ullanmoqdamiz. Bunga Xavfsizlik va axborot agentligi mas’uldir, shuningdek, bu borada ixtisoslashgan odamlar Serbiya hukumatida va boshqa barcha joylarda o‘z ishlarini qiladi. Biror narsaga kuch bilan erishaman, deb xayol qilganlar hech narsaga erisha olmaydi. Serbiya tinim bilmay olg‘a intilmoqda. Bu mening hammaga murojaatim – xavotir va tashvish kerak emas”, deydi Vuchich.

Avvalroq “Večernje novosti” gazetasi Serbiyadagi muxolifat vakillari 10 avgust kuni Belgradda rejalashtirilgan norozilik namoyishlaridan Prezident saroyini egallab olish, davlat rahbarini yo‘q qilish uchun foydalanishga tayyorligi haqida xabar bergan edi. Nashrning ta’kidlashicha, avvalroq ekologik norozilik namoyishlarining asosiy ishtirokchilari "rangli inqiloblarni qo‘zg‘atish uchun aniq sxemani qo‘llashni" boshlagan. 

"Agar bu Serbiyadagi Maydan dahshatlarini takrorlashga aniq chaqiriq bo‘lmasa, kimdir bu nima ekanligini tushuntirishga harakat qiladimi? Buning ortida qanday xorijiy omil yoki omillar turibdi, degan savolga javob kutyapmiz, ammo mumkin va real javoblar soni tobora torayib bormoqda, chunki biz hammamiz ikkita narsani yaxshi bilamiz: chet elliklarsiz rangli inqiloblar bo‘lmaydi, Serbiyaning to‘liq beqarorlashuvi ularning manfaatlariga xizmat qiladi”, deya ta’kidlaydi gazeta.

Rossiya Tashqi ishlar vazirligi rasmiy vakili Mariya Zaxarovaning ta’kidlashicha, Serbiyadagi vaziyat tahlili “yovuz kuchlar”ning ushbu mamlakatdagi vaziyatni buzishga urinishlari qayta tiklanganidan dalolat beradi. 

Qayd etish joizki, 19 iyul kuni Serbiya va Yevropa Ittifoqi o‘rtasida xomashyo sohasida strategik hamkorlikni o‘z ichiga olgan anglashuv memorandumi imzolandi. Hujjat Belgradda bo‘lib o‘tgan strategik xomashyo bo‘yicha sammit doirasida imzolandi, unda Serbiya Prezidenti Aleksandr Vuchich va Germaniya kansleri Olaf Shols, Yevropa komissiyasi rahbari o‘rinbosari Marosh Shefchovich, Serbiya hukumati a’zolari va G‘arb diplomatlari ishtirok etdi. Memorandum ekologik toza ishlab chiqarishni ta’minlash va Serbiyaning Jadar daryosi vodiysida elektromobillar akkumulyatorlarini ishlab chiqarish uchun muhim bo‘lgan litiy konini o‘zlashtirishga qaratilgan.

Serbiya muxolifati fuqarolarning hayotiga xavf tug‘dirishi va atrof-muhitga mumkin bo‘lgan zarari sababli litiy qazib olish bo‘yicha ehtimoliy operatsiyalarga qat’iyan qarshi chiqib, butun mamlakat bo‘ylab norozilik namoyishlariga chaqirmoqda.