Nebenzya NATOga Ukrainaning Rossiya hududidagi zarbalari oqibatlari bilan tahdid qildi

Ukraina hududidan Rossiyaga G‘arb qurollari bilan zarbalar NATOni Rossiya Federatsiyasining Ukrainaga qarshi urushiga “to‘g‘ridan to‘g‘ri jalb qiladi”. Bu haqda kecha, 13 sentyabr kuni BMT Xavfsizlik kengashi yig‘ilishida Rossiyaning BMTdagi doimiy vakili Vasiliy Nebenzya ma’lum qildi.

Rossiya tashabbusi bilan BMT Xavfsizlik kengashi Ukrainaga G‘arb qurollarini yetkazib berish bo‘yicha navbatdagi yig‘ilish o‘tkazdi. Vasiliy Nebenzya Ukrainaning Rossiya Federatsiyasiga chuqur zarba berish uchun G‘arb qurollaridan foydalanishi muhokamasidan xavotir bildirdi.

O‘z navbatida, Amerika vakili Robert Vud Qo‘shma Shtatlar Ukrainaga havo hujumidan mudofaa tizimini yaratishda yordam berishga tayyorligini ta’kidladi.

Vasiliy Nebenzyaning aytishicha, agar Rossiya hududida G‘arb qurollaridan foydalanishga qo‘yilgan cheklovlar bekor qilinsa, “bu Rossiyaning G‘arb lageri bilan munosabatlarini tubdan o‘zgartiradi”.

“Bu endi NATO davlatlari Rossiya bilan to‘g‘ridan to‘g‘ri urush boshlashini anglatadi. Bunday qurollardan foydalanish faqat AQSH va Yevropa Ittifoqi sun’iy yo‘ldoshlaridan olingan razvedka ma’lumotlariga ega bo‘lgan taqdirdagina mumkin. Ukrainaning o‘zi bunday imkoniyatga ega emas. Faqat NATO xodimlari raketa tizimlari uchun parvoz missiyalarini dasturlashi mumkin. Aslini olganda, gap Kiyevga butun Rossiya bo‘ylab uzoq masofali qurollardan foydalanishga ruxsat berish haqida emas, balki to‘g‘ridan-to‘g‘ri G‘arbda zarba berish uchun nishonlar bo‘yicha qaror qabul qilish haqida ketmoqda. Ukraina millatchilarining rasman tugmani bosishi muhim emas. NATO yadroviy kuchga qarshi to‘g‘ridan-to‘g‘ri harbiy harakatlar mamlakatiga aylanadi. Menimcha, bu qanday oqibatlarga olib kelishi mumkinligini tushuntirishga hojat yo‘q”, deydi Nebenzya.

Nebenzya, shuningdek, xalqaro hamjamiyatning Rossiyaning Erondan qisqa masofaga uchuvchi raketalarni sotib olgani haqidagi ayblovlarini “tuhmat” deb atadi. 

Biroq AQSHning BMTdagi elchisi Robert Vudning aytishicha, aynan Eron raketalarini yetkazib berish vaziyatning keskinlashuviga olib kelayotgani shubhasiz haqiqatdir.

“2023 yil oxirida Eron va Rossiya Ukrainaga qarshi tajovuzni davom ettirish uchun Rossiyaga yuzlab raketalarni yetkazib berish bo‘yicha kelishuv imzoladi. Joriy yilning yozida eronlik mutaxassislar rossiyalik harbiylarga Fath-360 tizimidagi Eronning qisqa masofali raketalaridan foydalanishga o‘rgatishgan. Rossiya shu oyda Erondan yuzlab shunday raketalarni oldi. Ularning maksimal parvoz masofasi 120 kilometrni tashkil qiladi. Ular Rossiyaga o‘zining uzoq masofali raketalarini butun Ukraina bo‘ylab qo‘llash va qishda Ukraina infratuzilmasini yanada yo‘q qilish imkonini beradi. Eron raketalarining uzatilishi jiddiy eskalatsiya va beqarorlashtiruvchi omil bo‘lib, ukrainaliklarning azobini oshiradi”, dedi Robert Vud.

Amerika vakili Qo‘shma Shtatlar Ukrainani qo‘llab-quvvatlashda davom etishga tayyorligini bildirdi.

“Ukrainaga raketa hujumlaridan himoya qilishda shoshilinch yordam berish zarurligi aniq. Bu hujumlar BMT Nizomini buzadi va xalqaro tinchlik va xavfsizlikka, jumladan, oziq-ovqat xavfsizligiga putur yetkazadi. Kechagina Rossiya Qora dengizda Misrga bug‘doy olib ketayotgan fuqaro yuk kemasini urib yubordi. Ukrainada integratsiyalashgan havo mudofaa tizimini qurish biz uchun ustuvor vazifadir va bu hujumlar bizning harakatlarimizni to‘xtata olmasligimizni ko‘rsatadi. Biz Ukraina bilan Rossiyaning raketa va dron hujumlaridan o‘zini himoya qilish uchun barcha imkoniyatlarga ega bo‘lishini ta’minlash uchun hamkorlik qilamiz”, dedi Robert Vud.

“The Guardian” gazetasining yozishicha, Buyuk Britaniya allaqachon Ukrainaga Rossiyaga yetkazib berayotgan Storm Shadow qanotli raketalarini uchirishga ruxsat bergan. Biroq, Qo‘shma Shtatlar bunday ruxsat bermadi. “The Guardian” nashri Vashington va London bu masala bo‘yicha birgalikda ijobiy qaror qabul qilgani va shuning uchun ham AQSH Davlat kotibi Entoni Blinken va Buyuk Britaniya Tashqi ishlar vaziri Devid Lemmi 11 sentyabr kuni Kiyevga birga kelganini yozdi. Biroq ularning tashrifi chog‘ida Ukraina Qurolli kuchlari uchun harbiy cheklovlar bekor qilingani haqida rasmiy xabar berilmagan.

Rossiya Prezidenti Vladimir Putinning aytishicha, Ukrainaning Rossiya hududiga zarbalari uchun G‘arbning uzoq masofali aniqlikdagi qurollaridan foydalanish NATO davlatlarining urushda bevosita ishtirok etishini anglatadi.

“Bunday holda, Ukrainadagi mojaroning mohiyati o‘zgaradi va Rossiya paydo bo‘layotgan tahdidlar asosida tegishli qarorlar qabul qiladi", deb tahdid qildi Putin.

Buyuk Britaniya Bosh vaziri Kir Starmer Vashingtonga uchishidan oldin uning mamlakati Rossiya bilan “mojaro qidirmayotganini” aytdi. Shu bilan birga, Britaniya Bosh vaziri Ukraina bilan urushni aynan Rossiya Federatsiyasi boshlaganini, Kiyev o‘zini himoya qilish huquqiga ega ekanligini eslatdi.

Germaniya Mudofaa vaziri Boris Pistorius 14 sentyabr kuni xalqaro qonunlar Ukrainaga o‘zini himoya qilish maqsadida Rossiya ichidagi nishonlarga zarba berishga ruxsat berishini aytdi. Ukraina Prezidenti Vladimir Zelenskiy G‘arb hamkorlaridan bunga ruxsat berishni so‘radi.

AQSH Prezidenti Jo Bayden kecha, 13 sentyabr kuni Vashingtonda Buyuk Britaniya Bosh vaziri Kir Starmer bilan uchrashdi. Ikki davlat yetakchilari Ukrainani “shaklsiz” qo‘llab-quvvatlashlarini yana bir bor tasdiqladi. Biroq uchrashuvdan so‘ng Ukraina Qurolli kuchlarining G‘arb qurollari bilan Rossiya Federatsiyasi hududlarini nishonga olish uchun kutilayotgan ruxsati e’lon qilinmadi.