Rossiya NATOga hujum qilishi mumkinmi? Razvedka prognoz e’lon qildi

Hozirda Daniyaga Rossiya hujumi xavfi yo‘q. Biroq kelgusi yillarda bunday tahdidning paydo bo‘lish ehtimoli ortadi. Bu xulosalar Skandinaviya qirolligi razvedka xizmati tomonidan 9 fevralda chop etilgan “Prognoz 2024” hisobotida keltirilgan.

Hisobot mualliflarining aytishicha, 2022 yildan beri Ukrainadagi harbiy harakatlar fonida Rossiya Qurolli kuchlarni keng ko‘lamli rekonstruksiya qilish va isloh qilish ishlarini olib bormoqda.

Shu bilan birga, 2024 yil davomida bu sa’y-harakatlar o‘z xarakterini “qayta qurishdan NATO kuchlari bilan teng sharoitlarda kurashish qobiliyatiga ega bo‘lish maqsadida harbiy salohiyatni jadal rivojlantirishga” o‘zgartirgan.

“Xitoyning moliyaviy va moddiy yordami, shuningdek, Shimoliy Koreya va Eronning qo‘shin va qurol tizimlari bilan ko‘magi Rossiyaga resurslarni bo‘shatishda tobora ko‘proq yordam bermoqda. Bu Rossiyaning NATOga qarshi urush boshlash qarori qabul qilinganligini anglatmaydi. Biroq Rossiya o‘zini qurollantirmoqda va bunday qaror qabul qilish qobiliyatiga ega”, deb ishonadi Daniya razvedkasi.

Hisobotda keltirilishicha, ayni paytda Rossiya NATO shartnomasining 5-moddasi faollashishiga olib keladigan harakatlardan qochishni davom ettirmoqchi.

“Biroq kuchlarning nisbiy balansi Rossiya foydasiga o‘zgarsa, Rossiyaning NATOga nisbatan tavakkalchilik ishtahasi oshishi mumkin”, deyiladi xabarda.

Kuchlar muvozanatining bunday o‘zgarishi, hisobot mualliflariga ko‘ra, agar Rossiya o‘z harbiy salohiyatini oshirsa va G‘arb o‘zinikini kuchaytirmasa sodir bo‘ladi.

Daniya razvedka ma’lumotlariga ko‘ra, agar Moskva NATOni harbiy jihatdan zaiflashgan yoki siyosiy jihatdan bo‘lingan deb bilsa, Rossiya bir yoki bir nechta Yevropaning NATOga a’zo davlatlariga qarshi mintaqaviy urushda harbiy kuch ishlatishga ko‘proq tayyor bo‘lardi.

“Bu, ayniqsa, agar Moskva Qo‘shma Shtatlar u bilan urushda Yevropa NATO davlatlarini qo‘llab-quvvatlashga qodir emas yoki buni xohlamaydi, deb hisoblasa, dolzarb bo‘ladi”, deyiladi hisobotda.

Daniya razvedkasi Rossiyadan haqiqiy harbiy tahdid Ukrainadagi urushning rivojlanishiga ham bog‘liq, deb hisoblaydi. 

“Rossiya Ukrainada va bir yoki bir nechta NATO davlatlari bilan bir vaqtda urush olib borishi dargumon”, deyiladi hisobotda.

Biroq Ukrainadagi urush tugaganidan so‘ng, hisobot mualliflariga ko‘ra, 6 oy ichida Moskva Rossiya bilan chegaradosh mamlakatda mahalliy urush olib borishi mumkin.

“Taxminan 2 yil ichida bir yoki bir nechta NATO mamlakatlari uchun haqiqiy xavf tug‘diradi va shu tariqa Boltiq dengizi mintaqasidagi bir nechta mamlakatlarga qarshi mintaqaviy urushga tayyor bo‘ladi; taxminan 5 yil ichida u AQSH ishtirokisiz Yevropa qit’asida keng ko‘lamli urushga tayyor bo‘lishi mumkin”, deyiladi hisobotda.