Россия НАТОга ҳужум қилиши мумкинми? Разведка прогноз эълон қилди

Ҳозирда Данияга Россия ҳужуми хавфи йўқ. Бироқ келгуси йилларда бундай таҳдиднинг пайдо бўлиш эҳтимоли ортади. Бу хулосалар Скандинавия қироллиги разведка хизмати томонидан 9 февралда чоп этилган “Прогноз 2024” ҳисоботида келтирилган.

Ҳисобот муаллифларининг айтишича, 2022 йилдан бери Украинадаги ҳарбий ҳаракатлар фонида Россия Қуролли кучларни кенг кўламли реконструкция қилиш ва ислоҳ қилиш ишларини олиб бормоқда.

Шу билан бирга, 2024 йил давомида бу саъй-ҳаракатлар ўз характерини “қайта қуришдан НАТО кучлари билан тенг шароитларда курашиш қобилиятига эга бўлиш мақсадида ҳарбий салоҳиятни жадал ривожлантиришга” ўзгартирган.

“Хитойнинг молиявий ва моддий ёрдами, шунингдек, Шимолий Корея ва Эроннинг қўшин ва қурол тизимлари билан кўмаги Россияга ресурсларни бўшатишда тобора кўпроқ ёрдам бермоқда. Бу Россиянинг НАТОга қарши уруш бошлаш қарори қабул қилинганлигини англатмайди. Бироқ Россия ўзини қуроллантирмоқда ва бундай қарор қабул қилиш қобилиятига эга”, деб ишонади Дания разведкаси.

Ҳисоботда келтирилишича, айни пайтда Россия НАТО шартномасининг 5-моддаси фаоллашишига олиб келадиган ҳаракатлардан қочишни давом эттирмоқчи.

“Бироқ кучларнинг нисбий баланси Россия фойдасига ўзгарса, Россиянинг НАТОга нисбатан таваккалчилик иштаҳаси ошиши мумкин”, дейилади хабарда.

Кучлар мувозанатининг бундай ўзгариши, ҳисобот муаллифларига кўра, агар Россия ўз ҳарбий салоҳиятини оширса ва Ғарб ўзиникини кучайтирмаса содир бўлади.

Дания разведка маълумотларига кўра, агар Москва НАТОни ҳарбий жиҳатдан заифлашган ёки сиёсий жиҳатдан бўлинган деб билса, Россия бир ёки бир нечта Европанинг НАТОга аъзо давлатларига қарши минтақавий урушда ҳарбий куч ишлатишга кўпроқ тайёр бўларди.

“Бу, айниқса, агар Москва Қўшма Штатлар у билан урушда Европа НАТО давлатларини қўллаб-қувватлашга қодир эмас ёки буни хоҳламайди, деб ҳисобласа, долзарб бўлади”, дейилади ҳисоботда.

Дания разведкаси Россиядан ҳақиқий ҳарбий таҳдид Украинадаги урушнинг ривожланишига ҳам боғлиқ, деб ҳисоблайди. 

“Россия Украинада ва бир ёки бир нечта НАТО давлатлари билан бир вақтда уруш олиб бориши даргумон”, дейилади ҳисоботда.

Бироқ Украинадаги уруш тугаганидан сўнг, ҳисобот муаллифларига кўра, 6 ой ичида Москва Россия билан чегарадош мамлакатда маҳаллий уруш олиб бориши мумкин.

“Тахминан 2 йил ичида бир ёки бир нечта НАТО мамлакатлари учун ҳақиқий хавф туғдиради ва шу тариқа Болтиқ денгизи минтақасидаги бир нечта мамлакатларга қарши минтақавий урушга тайёр бўлади; тахминан 5 йил ичида у АҚШ иштирокисиз Европа қитъасида кенг кўламли урушга тайёр бўлиши мумкин”, дейилади ҳисоботда.