Ramzan Qodirov Prigojinning o‘limini Rossiya uchun katta yo‘qotish deb atadi

Checheniston rahbari Ramzan Qodirov Yevgeniy Prigojinning oilasi va yaqinlariga hamdardlik bildirib, uning Ukrainadagi harbiy harakatlarga qo‘shgan hissasini qayd etdi. Bu haqda u o‘zining Telegram-kanalida yozdi.

"Shubhasiz, u “maxsus harbiy operatsiya”ni o‘tkazishga katta hissa qo‘shgan. Va bu xizmatlarini undan tortib olib bo‘lmaydi. Uning vafoti butun mamlakat uchun katta yo‘qotishdir. Yevgeniy Viktorovichning oila a’zolari va yaqinlariga chuqur hamdardlik bildiraman", deydi Qodirov.

Uning ta’kidlashicha, Prigojin bilan birga u ko‘p marta qiyin masalalarni hal qilishga majbur bo‘lgan. 

"Biz unga Liviya va Afrikadagi ba’zi masalalarda ham yordam berdik. Bizni ko‘p narsa bog‘ladi", deya qo‘shimcha qilgan Qodirov.

Shu bilan birga, u Prigojin so‘nggi paytlarda mamlakatda sodir bo‘layotgan voqealarning to‘liq tasvirini ko‘ra olmaganini ta’kidlagan. 

"Men undan muhim davlat ahamiyatiga ega bo‘lgan ishlar uchun shaxsiy ambitsiyalarini tark etishini so‘ragandim. Qolgan hamma narsa keyinroq hal qilinishi mumkin. Ammo u shunday odam edi. Prigojin o‘zining temir xarakteri bilan maqsadiga shu yerda va hozir erishishni istardi", deb yozadi Checheniston rahbari.

Eslatib o‘tamiz, 23 avgust kuni Rossiyaning Tver viloyatida halokatga uchragan samolyot bortida “Vagner” rahbari Yevgeniy Prigojin va uning hammuassisi Dmitriy Utkin bo‘lgani, bortdagi barcha 10 yo‘lovchi halok bo‘lgani aytilgandi. Kecha, 24 avgust kuni Rossiya Prezidenti Vladimir Putin samolyot halokatida halok bo‘lganlarning oila a’zolariga hamdardlik bildirgan va Prigojinni iste’dodli tadbirkor, biroq taqdiri og‘ir inson bo‘lgani va hayotida jiddiy xatolarga yo‘l qo‘yganini qayd etgandi.