Pxenyan Seulga qarshi urushda qatnashish uchun 1,4 mln fuqaro ariza berganini e’lon qildi

Shimoliy Koreyada shu hafta davomida taxminan 1,4 mln fuqaro armiyaga qabul qilish yoki qaytarishni so‘rab ariza yozgan. Bu haqda “Reuters” xabar berdi. 

Qayd etilishicha, bir hafta ichida 1,4 million yoshlar harbiy xizmatga qo‘shilish yoki qaytish uchun ariza topshirgan va ular Janubiy Koreyaga qarshi “muqaddas urush”da qatnashmoqchiligini bildirgan.

"Yoshlar, jumladan, armiya safiga qo‘shilish to‘g‘risida petitsiyaga imzo chekkan talabalar ligasi rasmiylari inqilob qurollari bilan dushmanni yo‘q qilish uchun muqaddas urushda qatnashishga bel bog‘lagan”, deb yozdi KXDR ommaviy axborot vositalari.

Xalqaro strategik tadqiqotlar instituti ma’lumotlariga ko‘ra, Shimoliy Koreyada 1,28 million faol askarlar va 600 mingga yaqin zahiradagi askarlar, ko‘plab qurolsiz bo‘linmalar orasida 5,7 million ishchi dehqon qizil gvardiya zahirasi bor.

"Agar urush boshlansa, Koreya Respublikasi xaritadan o‘chib ketadi. U urushni xohlayotgani uchun biz uning mavjudligiga chek qo‘yishga tayyormiz", deyiladi xabarda.

Janubiy Koreya Mudofaa vazirligi yuqoridagi bayonotlarga izoh bermadi, biroq Shimoliy Koreya janubiy koreyaliklarning xavfsizligiga zarar yetkazsa, o‘sha kun “rejimining oxiri” bo‘lishidan ogohlantirdi.

Shimoliy Koreya ilgari keskinlik kuchaygan bir paytda harbiy xizmatga kirishga intilayotgan yoshlar haqida ham xuddi shunday da’volarni ilgari surgan, ammo izolyatsiya qilingan mamlakatning bunday bayonotlarini tasdiqlash qiyin.

O‘tgan yili davlat ommaviy axborot vositalari o‘z fuqarolarining 800 000 nafari urushga borishi haqida xabar berib, Qo‘shma Shtatlarga qarshi jang qilish uchun Shimol armiyasiga qo‘shilish uchun ko‘ngilli bo‘lgani aytilgandi. Shuningdek, 2017 yilda 3,5 millionga yaqin ishchi, partiya a’zolari va askarlar o‘z ixtiyori bilan xizmat qilgani aytilgan.

Eslatib o‘tamiz, avvalroq KXDR Janubiy Koreya bilan chegaradagi qo‘shinlarini jangovar holatga keltirmoqchiligi haqida ma’lumot bergandi. Biroz vaqt o‘tib Shimoliy Koreya Janubni poytaxt Pxenyan ustidan dronlar uchirishda ayblab, ikki davlat orasidagi chegarani portlatishga tayyorlanayotganligini e’lon qilgandi. Keyinchalik Shimoliy Koreya Janubiy Koreyaga olib boruvchi g‘arbiy va sharqiy chegaradagi ikkita avtomagistral uchastkalarini portlatib yubordi. Janubiy Koreya harbiylari KXDR tomonidan ikkita mamlakatlararo yo‘l uchastkalarining portlatilishiga o‘q uzib javob berdi.