Pentagon Kiyevga yana 500 mln dollarlik harbiy yordam yuboradi. Unga nimalar kiradi?

AQSH Mudofaa vazirligi Ukrainaga 500 million dollarlik yangi yordam paketini yuborishini e’lon qildi. Bu haqda Pentagonning rasmiy sahifasida chop etilgan hujjatda aytildi.

Yangi yordam paketi o‘nlab Bredley piyodalar jangovar mashinalari, Stryker zirhli jangovar texnikalari, shuningdek, Patriot zenit-raketa tizimi uchun o‘q-dorilarni o‘z ichiga oladi.

Bundan tashqari, yangi paketda termal tasvir tizimlari va tungi ko‘rish qurilmalari, generatorlar hamda avtomobillarni ta’mirlash va hududlarni minalardan tozalash uchun turli jihozlar ham bor.

Shuningdek, ushbu paket 30 ta Bradley IFV, 25 ta Stryker AFV, Stinger yer-havo raketa tizimlari, HIMARS raketa-artilleriya tizimining o‘q-dorilari, portlovchi snaryadlar va muhandislik to‘siqlarini yengib o‘tish uchun vositalar, 155 va 105 millimetr kalibrli artilleriya o‘qlarini o‘z ichiga oladi.  

Eslatib o‘tamiz, shu oy boshida Pentagon Kiyevga 300 million dollarlik harbiy yordam ajratishini e’lon qilgandi.