Orbanga Turkiy dunyoning oliy ordeni topshirildi

Qirg‘iziston Prezidenti Sadir Japarov bugun, 6 noyabr kuni Vengriya Bosh vaziri Viktor Orbanga Turkiy dunyoning oliy ordenini topshirdi. Bu haqda Qirg‘iziston rahbarining matbuot xizmati xabar berdi.

Qayd etilishicha, mukofot Viktor Orbanga a’zo davlatlar va Turkiy davlatlar tashkiloti kuzatuvchilari o‘rtasidagi munosabatlarni rivojlantirish, shuningdek, tashkilotning xalqaro maydondagi nufuzini oshirishdagi alohida xizmatlari uchun topshirilgan.

Taqdimot marosimida Sadir Japarov Vengriya Turkiy davlatlar tashkilotida alohida o‘rin tutishini ta’kidladi.

“Mamlakatlarimiz o‘rtasida barcha darajadagi muhim siyosiy muloqot yo‘lga qo‘yilgan, turli sohalarda samarali hamkorlik, Yevropa Ittifoqi va boshqa xalqaro tashkilotlar doirasida sheriklik aloqalari izchil davom ettirilmoqda”, dedi Qirg‘iziston rahbari.

U Viktor Orban rahnamoligida Vengriyaning Yevropa Ittifoqi va turkiy davlatlar o‘rtasidagi munosabatlardagi o‘rni barqaror o‘sib borayotgani va ahamiyati tobora ortib borayotganini ta’kidladi.

“Vengriyalik birodarlarimiz bilan hamkorligimiz uzoq muddatli, samarali va amaliy hamkorlikni rivojlantirishga qaratilgan. Budapeshtda tashkilotning Yevropa vakolatxonasining ochilishi vengriyalik hamkasblarimizning turkiy integratsiyaga intilishi va janob Viktor Orbanning shaxsiy hissasi tufayli amalga oshdi”, dedi Japarov.

Prezident, bugungi kunda Vengriyadagi TDT vakolatxonasi faoliyati turkiy va Yevropa davlatlari o‘rtasidagi siyosiy muloqotni rivojlantirishning muhim mexanizmi va ko‘prigiga aylanganini ta’kidladi. Prezident Sadir Japarovning qo‘shimcha qilishicha, Budapesht idorasi rahbarligida suv resurslarini boshqarish bo‘yicha jahon andozalari darajasidagi vengriyalik muhandislarning bilim va texnologiyalaridan foydalanadigan Qurg‘oqchilikning oldini olish instituti tashkil etilgan. Bu, ayniqsa, global iqlim o‘zgarishi sharoitida to‘g‘ri keladi.

Eslatib o‘tamiz, o‘tgan yili TDTning Ostonada o‘tgan 10-sammitida O‘zbekiston Prezidenti Shavkat Mirziyoyev Turkiy dunyo oliy ordeni bilan taqdirlangandi.