Nazarboyevning oligarx qudasi 4 yulduzli mehmonxonasini davlatga topshirdi

Qozog‘istonning birinchi prezidenti Nursulton Nazarboyevning qudasi, tadbirkor Qayrat Boranboyev o‘z ixtiyori bilan qiymati 1,4 milliard tenge (taxminan 3 million dollar) dan ortiq bo‘lgan “Comfort Hotel Astana” mehmonxona majmuasini davlat hisobiga o‘tkazdi. Bu haqda mamlakat Moliyaviy monitoring agentligi xabar berdi.

Maydoni 5 ming kvadrat metrdan ortiq bo‘lgan mehmonxona Qozog‘iston poytaxti markazida joylashgan bo‘lib, uning yillik aylanmasi deyarli 900 million tengeni (1,9 million dollar) tashkil etadi.

“Ushbu inshootdan amaldagi qonunchilikka muvofiq ijtimoiy maqsadlarda foydalanish, dam olish, reabilitatsiya va ta’lim markazlarini tashkil etish rejalashtirilgan”, deyiladi xabarda. 

Agentlikning matbuot xizmatiga ko‘ra, aktivlarni qaytarish bo‘yicha ishlar davom etmoqda.

Ma’lumot uchun, taniqli qozoq oligarxi,  McDonald’sʼning Qozog‘iston, Rossiya va Belarusdagi franshizasi egasi Qayrat Boranbayev Qozog‘istonning eng boy odamlaridan biri, mamlakatning birinchi prezidenti Nursulton Nazarboyevning qudasi hisoblanadi. Boranbayevning qizi Nazarboyevning nabirasi Oysultonga turmushga chiqqan.

Eslatib o‘tamiz, joriy yilning sentyabr oyida Ostona jinoyat ishlari bo‘yicha sudlov hay’ati Qayrat Boranbayevni mol-mulki musodara qilingan holda 6 yilga ozodlikdan mahrum qilishga hukm qilgandi. 

Boranbayev 2022 yil mart oyi o‘rtalarida hibsga olingan edi. 2023 yil 31 mart kuni Ostona sudi Boranbayev va uning ikkala sherigini ham gaz yetkazib berish vaqtida “Qazaq Gaz” milliy kompaniyasidan yirik miqdordagi mablag‘larni o‘g‘irlaganlikda ayblab, sakkiz yilga o‘rtacha tartibli koloniyaga hukm qilgan. Biroq iyul oyi boshida hukm Ostonadagi jinoiy ishlar bo‘yicha sudlov hay’ati tomonidan bekor qilingan. Avgust oyida Boranbayevning advokati Daniyar Kanafin uning himoyasidagi shaxs aybini tan olgani va yetkazilgan zararni ixtiyoriy ravishda qoplash masalasida tergov bilan hamkorlik qilmoqchiligini bildirgan.