Navalniy Kreml tomonidan vahshiylarcha o‘ldirilgani aytilmoqda

Latviya Prezidenti Edgar Rinkevich Rossiya rasmiylarini qotillikda ayblab, Aleksey Navalniyning o‘limi haqidagi xabarlarga izoh bergan birinchi jahon yetakchisi bo‘ldi. U bu haqda o‘zning X ijtimoiy tarmog‘idagi sahifasida so‘z ochdi.

Rinkevichga ko‘ra, hozirgi Rossiyaning asl qiyofasini hamma bilishi kerak.

 “Siyosatchi sifatida Aleksey Navalniy haqida nima deb o‘ylaysiz? U shunchaki Kreml tomonidan shafqatsizlarcha o‘ldirilgan. Bu haqiqat va hozirgi Rossiya rejimining asl mohiyati haqida hamma bilishi kerak bo‘lgan narsa. Marhumning oilasi va yaqinlariga hamdardlik bildiraman”, deb yozadi Rinkevich.

Buyuk Britaniya Bosh vaziri Rishi Sunak esa Navalniyning o‘limini rus xalqi uchun katta fojia, deb atagan.

“Bu dahshatli xabar. Rossiyaning eng ashaddiy demokratiya himoyachisi sifatida Aleksey Navalniy butun umri davomida aql bovar qilmaydigan jasorat ko‘rsatdi. Men uning rafiqasi va Rossiya xalqiga hamdardlik bildiraman, ular uchun bu juda katta fojia”, degan Sunak.

Qayd etish kerakki, bugun, 16 fevral kuni Rossiya Federal jazoni ijro etish xizmati Yamal-Nenets avtonom okrugi boshqarmasi Navalniy Xarp qishlog‘idagi maxsus rejimli koloniyada vafot etganini ma’lum qildi. 

Ta’kidlanishicha, muxolifatchi qamoqda o‘zini yomon his qilgan va tez orada vafot etgan. Rossiya Prezidenti matbuot kotibi Dmitriy Peskov Vladimir Putinga Navalniyning o‘limi haqida xabar berilganini aytdi.

Aleksey Navalniyning matbuot kotibi Kira Yarmish esa siyosatchining sheriklari uning o‘limi haqida hech qanday ma’lumotga ega emasligi haqida bayonot berdi. Uning so‘zlariga ko‘ra, Navalniyning advokati Xarpga yetib borgan.