Mirziyoyev Abu-Dabi valiahdi bilan Husanov haqida suhbatlashdi (video)

O‘zbekiston Prezidenti Shavkat Mirziyoyev BAAdagi safari davomida Abu-Dabi valiahd shahzodasi Shayx Xolid ibn Muhammad Ol Nahayon bilan uchrashib, u bilan futbolchi Abduqodir Husanovning transferi haqida gaplashgan. Bu haqda “Menimcha” dasturida ma’lum qilindi.

13-15 yanvar kunlari Birlashgan Arab Amirligida rasmiy tashrif bilan bo‘lgan O‘zbekiston yetakchisi Shayx Xolid ibn Muhammad Ol Nahayon bilan uchrashdi va “Manchester Siti”ga o‘tishi aniq bo‘lib ulgurgan o‘zbekistonlik futbolchi Abduqodir Husanov transferi borasida suhbatlashdi.

“Shunday uchqur o‘g‘lon, professional futbolchi ulg‘aytirgan o‘zbek xalqiga rahmat”, dedi Ol Nahayon.

O‘z navbatida, O‘zbekiston yetakchisi ham ushbu transferdan xursandligini bildirdi.

“Rahmat, juda minnatdorman. Juda xursand bo‘ldim”, deya javob qaytardi Mirziyoyev.

Ma’lumot o‘rnida, Abduqodir Husanov “Lans”dan “Manchester Siti”ga bonuslar bilan hisoblaganda 50 million yevroga ko‘chib o‘tdi. Tomonlar 5+1 sxemasida shartnoma imzoladi.

Eslatib o‘tamiz, 11 yanvarga o‘tar kechasi insayder Fabritsio Romano futbolchining transferini tasdiqlagan edi.