Meksikalik bokschilar noqulay raqib bo‘ladi – Iqboljon Xoldorov

O‘zbekistonlik professional bokschi Iqboljon Xoldorov O‘zbekistonga qaytgach, QALAMPIR.UZ'ga meksikalik Eleazar Valenzuelaga qarshi jang taassurotlarini ma’lum qildi. 

Xoldorov 16 aprel kuni Meksikada faoliyatidagi 5-jangida g‘alabaga erishdi. U raqibini ilk raunddayoq nokautga uchratdi.

“Oson jang bo‘lmaydi deb o‘ylagandim. Meksikalik bokschilarning o‘ziga xos uslubi bor. Ko‘pchilik meksikalik bokschilar noqulay raqib bo‘ladi. Valenzuela hech bo‘lmaganda 4-5 raund munosib qarshilik ko‘rsatishini kutgandik. Boksda ham har xil holat kuzatilishi mumkin. Bitta zarba jang taqdirini hal qiladigan holatlar ham ko‘p bo‘ladi. Hammasini inobatga olib ringga chiqdim, biroq oson jang bo‘lishini kutmagandim”, deydi Xoldorov.

Xoldorov Valenzuelagacha bo‘lgan 4 ta jangida ham g‘alabaga erishgan. Iqboljon mag‘lubiyatga uchratgan Valenzuela esa profboksdagi 26-mag‘lubiyatini qabul qilib oldi.