Xoldorov havaskor boksdagi faoliyatini yakunladimi?

O‘zbekistonlik professional bokschi Iqboljon Xoldorov hali havaskor boksda ringga chiqishi mumkinligini ma’lum qildi. Bu haqda sportchi QALAMPIR.UZ muxbiri bilan suhbatda aytib o‘tdi.

“Hozircha faoliyatimni yuz foiz professional boksda davom ettiraman, deb ayta olmayman. Oldindan bir narsa deyish qiyin. Havaskor boksda ham hali janglar o‘tkazishim mumkin, chunki havaskorda isbotlashim kerak bo‘lgan natijalar bor. Hali oldinda Olimpiada bahslari kutib turibdi”, deydi Xoldorov.

Ma’lumot o‘rnida, Xoldorov professional boksda 5 ta jang o‘tkazib, barchasida g‘alabaga erishgan. Sportchining QALAMPIR.UZ'ga ma’lum qilishicha, uning keyingi jangi sanasi tez orada aniq bo‘ladi. Iqboljonning navbatdagi raqibi dunyo tanigan kuchli bokschilardan biri bo‘lishi kutilmoqda.

Eslatib o‘tamiz, avvalroq Xoldorov so‘ngi jangi haqida o‘z fikrlari bilan o‘rtoqlashib, oxirgi jangidagi raqibi meksikalik Eleazar Valenzuelaga qarshi to‘qnashuv oson bo‘lishini kutmaganini ta’kidlagandi.