Mashhur kriminal avtoritet va oligarxga tegishli 6,2 mln dollarlik mol-mulk sotuvga qo‘yildi

"Kolya Qirg‘iz" laqabi bilan tanilgan jinoiy avtoritet Qamchibek Ko‘lboyev va o‘tgan oyda ushlangan Qirg‘iziston bojxona xizmati rahbarining sobiq o‘rinbosari, oligarx Rayimbek Matraimovga tegishli ko‘chmas mulklar kimoshdi savdosiga qo‘yildi. Bu haqda Qirg‘iziston Davlat mulkini boshqarish agentligi xabar berdi.

Ko‘rgazmaga qo‘yilgan ashyolar uyushgan jinoyatchilik va korrupsiyaga qarshi kurash doirasida davlat mulkiga aylantirilgan. Lotlarning tavsifi agentlikning rasmiy veb-saytida e’lon qilingan.

Unga ko‘ra, Bishkek, O‘sh, Jalolobod va Chuy viloyatlarida jami 10 ta ko‘chmas mulk ob’ektlari taqdim etilgan bo‘lib, ularning umumiy boshlang‘ich bahosi – 556 309 300 som (6,24 million dollar)ni tashkil qilgan. Lotlarga kvartiralar, yer uchastkalari va tijoriy ko‘chmas mulklar kiradi.

Eng yuqori boshlang‘ich bahoga ega bo‘lgan – Cho‘lpon-Otadagi 161,47 gektar (1,6 million dollar) kurort-dam olish hududi, O‘sh shahrida qurilayotgan turar - joy majmuasidagi 1400 kvadrat metrlik binolar (1,68 million dollar), shuningdek, Chuy viloyatida joylashgan 53 gektarlik yer uchastkasi (1,03 million dollar) ham auksionga qo‘yilgan.

Bundan tashqari, ushbu ro‘yxatga quyidagilar kiradi:

• Bishkek shahridagi 244,5 akr (654,7 ming dollar) yer uchastkasi;
• umumiy foydalanishga yaroqli maydoni 181,1 kvadrat metr bo‘lgan noturar joy (Bishkek, 433 ming dollar);
• Cho‘lpon-Ota shahrida qurilishi tugallanmagan 2 gektar yer uchastkasi (422 ming dollar);
• Bishkek shahrida 6 sotix yer uchastkasi (200 ming dollar);
• bir xonali kvartira 51,9 kvadrat metr (O‘sh shahri, 91,8 ming dollar);
• Chuy viloyatidagi 8 sotix yer uchastkasi (70 ming dollar);
• O‘sh shahrida 60,5 kvadrat metr ikki xonali kvartira (56 ming dollar).

Eslatib o‘tamiz, joriy yilning 4 oktyabr kuni qirg‘izistonlik kriminal avtoritet Qamchibek Ko‘lboyev (“Kolya Qirg‘iz”) Bishkekda qo‘lga olinayotganda mamlakat Milliy xavfsizlik xodimlari tomonidan otib o‘ldirilgandi. Shundan so‘ng, Qirg‘iziston Milliy xavfsizlik davlat qo‘mitasi rahbari Qamchibek Tashiyev To‘qmoq shahrida qo‘mitaning yangi binosi ochilishida qatnashib, jinoyatchilarga qarata “bittasi bosh ko‘tarsa, o‘sha boshni chopishi”ni aytgandi. Shundan so‘ng Qamchibek Qo‘lboyev va Bojxona xizmati rahbarining sobiq o‘rinbosari Rayimbek Matraimov boshchiligidagi uyushgan jinoiy guruhga aloqador 180 dan ortiq mansabdor lavozimidan bo‘shatildi. Qirg‘izistonlik taniqli tadbirkor, Markaziy univermag (SUM) rahbari Anvar Gabbazov (hozirgi Mametov) xalqaro qidiruvga berildi. “Kolya Qirg‘iz”ga aloqadorlikda gumonlanib, “Ittipak” uyg‘ur diasporasi yetakchisi va Bishkekdagi “Madina” bozori asoschisi Tursuntoy Salimov hibsga olindi, uning o‘g‘li Ilshat esa qidiruvga berildi. Qirg‘iziston Jogorku Kenesh (parlament)ining sobiq deputati Boris Sanning o‘g‘li Aleksandr San ham qo‘lga olindi.

Qirg‘iziston Respublikasi Davlat bojxona xizmati raisining sobiq o‘rinbosari, oligarx Rayimbek Matraimov o‘tgan oyda Ozarbayjon poytaxti Bakuda qo‘lga olingandi.