“Коля Қирғиз”га алоқадор оиланинг кирдикорлари очилди
Олам
−
22 Ноябрь 2023
18514Қирғизистондаги жиноий тўданинг ўлдирилган бошлиғи Қамчибек Асанбек (Қамчи Кўлбоев – Коля Қирғиз)га алоқадорликда гумонланиб, “Иттипак” уйғур диаспораси етакчиси ва Бишкекдаги “Мадина” бозори асосчиси Турсунтой Салимов ҳибсга олинди, унинг ўғли Илшат эса қидирувга берилди. Бу ҳақда Миллий хавфсизлик давлат қўмитаси матбуот маркази хабар бермоқда.
Илшат Салимовга нисбатан Қирғизистон Республикаси Жиноят кодексининг 263- (уюшган гуруҳлар ва жиноий жамоаларни молиялаштириш) ва 224- (бир гуруҳ шахслар томонидан олдиндан тил бириктириб, эҳтиётсизлик туфайли оғир зарар етказган ҳолда шантаж қўллаш ёки зўравонлик қўллаш таҳдиди билан битимни бажаришга мажбурлаш ёки уни тугатишдан бош тортиш) моддалари билан сиртдан айблов эълон қилинган.
Илшат Салимов “Коля Қирғиз”нинг уюшган жиноий гуруҳи аъзоларини молиялаштириш, шунингдек, жиноий даромадларни легаллаштириш билан шуғулланган.
Махсус хизматлар маълумотларига кўра, кичик Салимов криминал авторитетнинг таъсиридан фойдаланиб, таҳдидлар йўли билан ўз шерикларини турли бизнес лойиҳаларидаги улушларидан ноқонуний равишда маҳрум қилган. Шундан сўнг у фойдадан ер участкаларини сотиб олиб, улушли иштирок ниқоби остида кейинчалик Кўлбоевнинг уюшган жиноий гуруҳига ҳомийлик қилган.
Илшат Салимовнинг қурилиш компанияларида улушлари бор, хусусан, у Бишкекда умумий майдони 3 гектардан ортиқ бўлган қимматбаҳо ер участкаларига эгалик қилади. Бундан ташқари, қурилиш компаниялари 110 дан ортиқ хонадонли (11 минг квадрат метр) кўп қаватли уйлар қурмоқда. Қурилаётган биноларнинг умумий қиймати қарийб 12 млн долларга баҳоланади.
Қайд этиш жоизки, Салимовлар оиласи Қамчи Кўлбоевнинг ҳомийлигидан фаол фойдаланган ва унинг кўмагида барча қурилиш лойиҳалари амалга оширилган.
1995 йилда “Мадина” МЧЖ (эгаси Турсунтой Салимов) “Қирғиз камол-тўқимачилик фабрикаси” АЖдан “Восток-5” микрорайон, 18/1-уйдаги собиқ 155-сонли болалар боғчаси биносини олган, ҳозирда “Прадо” дам олиш маскани шу ерда жойлашган. Объектнинг қиймати 5 миллион долларни ташкил этади. Мактабгача таълим муассасасини хусусийлаштириш тартиби қонун ҳужжатларини бузган ҳолда амалга оширилган.
“Кейинчалик Турсунтой ва Илшат Салимовлар ноқонуний йўл билан қўлга киритган мулкларини қонунийлаштириш мақсадини кўзлаб, қурилиш ташкилотларидан бири билан юқори сифатли кўп қаватли уй қуриш бўйича шартнома тузди. Кўп қаватли уй қурилишини бошлаш шартларидан бири тураржой биноси қурилишини якунлаш кафолати сифатида қурилиш компанияси томонидан қимматбаҳо квартира (нархи: 500 минг доллар) тақдим этилиши бўлди. Кейинчалик, собиқ болалар боғчаси ҳудудида тураржой биноси қуриш учун рухсатномалар олишнинг иложи йўқлиги сабабли шартнома бекор қилинди. Бироқ Илшат Салимов берилган квартирани қайтаришдан бош тортган ва Қамчибек Асанбек билан биргаликда тадбиркорларга босим ўтказиб, ўзгаларнинг мулкини ноқонуний эгаллаб олган”, дейилади хабарда.
Кейинчалик бу квартира Чўлпон-Ота шаҳридаги ер участкасига алмаштирилган, у ерда собиқ Zodiac казиноси ўрнида савдо маркази қурилган.
Бундан ташқари, таъсисчиларидан бири Илшат Салимов бўлган гуруҳ “Қирғиз камол фабрикаси” ОАЖдан умумий майдони 4,5 гектар бўлган, қарийб 11,5 миллион долларлик омборхонани ноқонуний равишда олиб қўйган.
“Ушбу фактлар билан бирга Салимовлар оиласининг Қамчибек Асанбек ва унинг жиноий гуруҳининг ноқонуний фаолиятига алоқадорлиги тўғрисида рад этиб бўлмас далиллар қўлга киритилди. Хусусан, Илшат Салимовнинг Когонат марказий ташкилотидаги 600 минг долларлик коттежи Қамчибек Асанбек ёзги уйи ёнида жойлашган. Шунингдек, Каганат курорт марказида 700 минг долларга яна бир коттеж қурилмоқда”, дейилади Миллий хавфсизлик давлат қўмитаси хабарида.
Бундан ташқари, Илшат Салимовнинг шаҳар марказида умумий қиймати қарийб 700 минг долларлик бир нечта қиммат хонадонлари бор ва юк ташиш, умумий овқатланиш, қурилиш ва бошқа фаолият турларига ихтисослашган бир қанча турли МЧЖлар эгасидир.
Ҳозирда у қидирувда. Салимовлар оиласининг жиноий йўл билан қўлга киритган қўшимча мол-мулкини аниқлаш бўйича тергов-тезкор тадбирлари ўтказилмоқда.
Маълумот учун, Илшатнинг отаси Турсунтой Салимов қўлга олиниб, Миллий хавфсизлик давлат қўмитасининг тергов изоляторига жойлаштирилган. 9 октябрь куни қўзғатилган жиноят иши доирасида “Мадина” асосчисига нисбатан Қирғизистон Республикаси Жиноят кодексининг 261-моддаси “Уюшган гуруҳ тузиш ёки унда иштирок этиш” бўйича айблов эълон қилинди. Шу куни Первомай туман суди уни 4 декабрга қадар ҳибсда сақлашга қарор қилган. Эртаси куни эса Турсунтой Салимов даволаниш учун “Бикард” хусусий клиникасига ўтказилган.
Эслатиб ўтамиз, жорий йилнинг 4 октябрь куни қирғизистонлик криминал авторитет Қамчибек Кўлбоев (“Коля Қирғиз”) Бишкекда қўлга олинаётганда мамлакат Миллий хавфсизлик ходимлари томонидан отиб ўлдирилганди. Шундан сўнг, Қирғизистон Миллий хавфсизлик давлат қўмитаси раҳбари Қамчибек Ташиев Тўқмоқ шаҳрида қўмитанинг янги биноси очилишида қатнашиб, жиноятчиларга қарата “биттаси бош кўтарса, ўша бошни чопиши”ни айтганди.