Legitimlik yo‘qoladi – Advokatlar palatasi raisi stiker bo‘yicha Aripov va Davletovga murojaat qildi

north_east

“Men noroziman”. Advokatlar palatasi raisi qonundagi o‘zgartirish bo‘yicha keskin fikr bilan chiqdi

north_east

Sizda u gina, bizda bu gina. Senator va advokatlar kelishib oldimi?

Ma’lumki, joriy yilning 28 mart kuni O‘zbekiston Respublikasiga koronavirusning kirib kelishi va tarqalishini oldini olish yuzasidan chora-tadbirlar dasturini tayyorlash bo‘yicha respublika maxsus komissiyasining 30 mart soat 06:00 dan 20 aprel soat 00:01 ga qadar viloyatlararo, Toshkent va Nukus shaharlari hamda viloyatlar markazlarida Davlat xizmatlari markazlari tomonidan beriladigan maxsus ruxsatnoma (stiker)larsiz avtomobil boshqarishni taqiqlashga qaratilgan qarori e’lon qilingan edi. 30 mart kuni ushbu qaror yanada takomillashtirilib, maxsus ruxsatnoma (stiker) berish tartibiga o‘zgartirish va qo‘shimchalar kiritildi. 

Ushbu masala yuzasidan Advokatlar palatasi O‘zbekiston Respublikasiga koronavirusning kirib kelishi va tarqalishining oldini olish bo‘yicha chora-tadbirlar dasturini tayyorlash bo‘yicha respublika maxsus komissiyasi raisi Abdulla Aripov hamda Adliya vaziri Ruslanbek Davletovga murojaat qilmoqda.

“Ayni chog‘da huquqni muhofaza qilish organlari hamda nazorat qiluvchi organlar o‘z faoliyatini davom ettirmoqda. Sudlarda ham ishlar butunlay to‘xtab qolgani yo‘q: Oliy sudi Rayosatining 2020 yil 20 martdagi RS-13-10-sonli qaroriga ko‘ra, ehtiyot chorasini belgilash, o‘zgartirish, muddatini uzaytirish, ma’muriy qamoqni qo‘llash, tibbiyot muassasasiga majburan joylashtirish, muomala layoqati cheklangan yoki muomalaga layoqatsiz deb topish kabi kechiktirib bo‘lmas toifadagi ishlarni ko‘rish belgilangan.

Binobarin, fuqarolarda o‘z huquq va erkinliklarini himoya qilishga ehtiyoj mavjud. Malakali yuridik yordam olish huquqi hamda himoyalanish huquqi konstitutsiyaviy tamal huquqlar bo‘lib, hech qachon cheklanishi mumkin emas, hatto ayni vaziyatda ham. Huquqni muhofaza qiluvchi organlar, nazorat qiluvchi organlar hamda sudning advokat ishtirokisiz xatti-harakatlari, agarda qonun mazkur ishtirokni taqazo etsa, legitimligini yo‘qotadi”, deyiladi Advokatlar palatasi rasmiy murojaatida.

Murojaatda Maxsus komissiya qaroriga professional burchini bajarayotgan advokatlarga avtotransport vositasida maxsus stikersiz, faqat advokatlik guvohnomasini ko‘rsatgan holda, to‘sqinliksiz harakatlanish huquqini beruvchi o‘zgartish kiritish iltimos qilingan.

Ma’lumot o‘rnida, Respublika maxsus komissiyasining qaroriga ko‘ra, quyidagi 22 toifaga kiruvchi avtotransportlar ruxsatnomasi harakatlanishi mumkin:

Tashkiliy-huquqiy shaklidan qat’i nazar sog‘liqni saqlash tizimidagi tashkilotlarning, tibbiy-sanitariya va epidemiologik xizmatlar ko‘rsatuvchi tashkilotlarning xizmat va xodimlarining shaxsiy avtotransport vositalari.

Farmatsevtika mahsulotlari ishlab chiqaruvchi tashkilotlarning xizmat avtotransport vositalari.

Fuqarolarga kechiktirib bo‘lmaydigan tez tibbiy yordam ko‘rsatish bilan bog‘liq hollarda tibbiyot muassasasiga borayotgan va undan qaytayotgan shaxsiy avtotransport vositalari. Bunga quyidagi hollar kirishi mumkin: homiladorlik, tug‘ruq,  tan jarohati, OIV/OITS, onkologik yordam, nurlanish terapiyasi, gemodializ yordamini ko‘rsatish, jarrohlik amaliyoti zarur bo‘lganda, inson hayotiga xavf tug‘dirayotgan boshqa holatlar.

Yo‘lovchi tashish faoliyati bilan shug‘ullanish litsenziyasiga ega bo‘lgan yo‘nalishsiz taksilarga (o‘zlarining ro‘yxatdan o‘tgan ma’muriy hududi doirasida va yo‘lovchilarsiz faqat yetkazib berish xizmatini ko‘rsatish maqsadida. Inson hayotiga xavf tug‘diradigan holatlarda va kechiktirib bo‘lmaydigan tibbiyot muolajalarni olayotgan bemor yo‘lovchilarni tashish mumkin.

Kommunal xizmat ko‘rsatuvchi tashkilotlar (gaz, elektr energiyasi, issiqlik ta’minoti, sovuq suv, suv oqava, chiqindi)ning xizmat avtotransport vositalari, ya’ni shaharlarning eng hayotiy zarur infratuzilmasi ishini samarali ishini ta’minlash maqsadida.

O‘zbekiston Respublikasi Prezidenti Administratsiyasi, Oliy Majlis palatalari, Vazirlar Mahkamasi, O‘zbekiston Respublikasi Prezidentining Davlat xavfsizlik xizmati, Davlat xavfsizlik xizmati, Milliy gvardiya, Davlat bojxona qo‘mitasi, Mudofaa vazirligi, Ichki ishlar vazirligi va Favqulodda vaziyatlar vazirligi xizmat va xodimlarning shaxsiy avtotransport vositalari.

Sud va prokuratura organlari xizmat va xodimlarning shaxsiy avtotransport vositalari. 

“O‘zbekiston temir yo‘llari” AJ, “Uzbekistan Airways”AJ, “Uzbekistan Airports” AJ va ularning tizimiga kiruvchi korxona va tashkilotlari

“O‘zaeronavigatsiya” agentligining xizmat avtotransport vositalari.

Hisob palatasi, Biznes-ombudsman, Inson huquqlari bo‘yicha vakil (Ombudsman), Inson huquqlari milliy markazi, Savdo-sanoat palatasi rahbarlari va ularning o‘rinbosarlari xizmat avtotransport vositalari.

Vazirliklar, davlat qo‘mitalari, agentliklar va boshqa davlat va xo‘jalik boshqaruvi organlari rahbarlari, ularning o‘rinbosarlarining xizmat avtotransport vositalari.

Markaziy bank va hududiy boshqarmalar xizmat avtotransport vositalari.

Tijorat banklari xizmat avtotransport vositalari.

Qoraqalpog‘iston Respublikasi Jo‘qorg‘i Kengesi va Vazirlar Kengashi raislari va ularning o‘rinbosarlari, hokimlar va ularning o‘rinbosarlari xizmat avtotransport vositalari.

O‘zbekiston milliy teleradiokompaniyasi, O‘zbekiston Milliy axborot agentligi xizmat avtotransport vositalari.

“Respublika inkassatsiya xizmati” DUK xizmat avtotransport vositalari.

Xorijiy davlatlarning diplomatik vakolatxonalari va xalqaro tashkilotlar xizmat avtotransport vositalari.

Aloqa xizmatlarini ko‘rsatuvchi tashkilotlar, “O‘zbekiston pochtasi” AJ, “O‘zbektelekom” AK va uning tashkilotlari hamda “O‘ZINFOKOM” yagona integratori” MCHJga tegishli xizmat avtotransport vositalari.

N1, N2 va N3 toifaga kiruvchi avtotransport vositalari.

“Toshshahartransxizmat” AK tarkibiga kiruvchi avtobus saroylarining M2 va M3 toifaga kiruvchi avtotransport vositalari.

Dafn marosimlarida xizmat ko‘rsatuvchi maxsus avtotransport vositalari (faqat dafn marosimlari xizmatini ko‘rsatish maqsadida).

Yo‘l-patrul xizmati avtomobillari yordamida kuzatilayotgan avtotransport vositalari.

Mavsumiy qishloq xo‘jaligi mahsulotlarini yetkazib beruvchi avtotransport vositalari.