Kuba ayollari O‘zbekiston mezbonlik qiladigan boks mundialida qatnashadimi?

Kubalik ayollarga rasman boks bilan shug‘ullanish va musobaqalarda qatnashish imkoniyati berildi. Bu haqda Kuba milliy sport, jismoniy tarbiya instituti rahbari o‘rinbosari Ariel Sayns ma’lumotiga tayanib, “Prensa Latina” axborot agentligi xabar berdi.

Saynsning so‘zlariga ko‘ra, bu qaror “mamlakatning boshqa tashkilot va muassasalari, jumladan, Kuba ayollari federatsiyasi” ishtirokida qabul qilingan. Kuba boks federatsiyasi rahbari Alberto Puig shu kungacha yakka tartibda shug‘ullanib kelayotgan ayollar o‘rtasida joriy yil oxirigacha milliy turnir o‘tkazish rejalashtirilayotganini aytib o‘tdi.

Musobaqa ishtirokchilari orasidan 12 nafar sara bokschini tanlab olish maqsad qilingan. Ularning bir qismi 2023 yil yozida Salvadorda bo‘lib o‘tadigan Markaziy Amerika o‘yinlarida, shuningdek, O‘zbekiston mezbonlik qiladigan ayollar o‘rtasidagi Jahon chempionatida ishtirok etishi kutilmoqda. Kubada ayollar boksini rivojlantirishning birinchi bosqichi keyingi kuzda Chilida bo‘lib o‘tadigan Panamerika o‘yinlaridan so‘ng yakunlanadi. Shundan so‘ng 2024 yil yozida bo‘lib o‘tadigan Parij Olimpiya o‘yinlarida ishtirok etish uchun boshqa strategiya ishlab chiqiladi.

Kuba boks maktabi dunyodagi eng yaxshi maktablardan biri hisoblanadi. Orol davlati sportchilari so‘nggi o‘n yillikda xalqaro musobaqalarda, jumladan, Olimpiya o‘yinlarida ham o‘nlab oltin medallarni qo‘lga kiritgan.