Koronavirus yetib borgan davlatlar 41 taga yetdi. Qurbonlar 53 nafarga ko‘paydi

Bugun, 26 fevral holatiga COVID-19 koronavirusi bilan kasallanganlar soni dunyo bo‘yicha 80 997 nafarga yetdi. Ularning 78 mingdan ziyodrog‘i Xitoyda aniqlangan.

Yangi koronavirusdan davolanganlar soni 30 115 nafarni tashkil qilyapti. 8839 nafar odamning ahvoli hamon og‘irligicha qolmoqda.

Koronavirus qurbonlari soni 2764 nafarga yetdi. Qurbonlar kechagiga nisbatan 53 kishiga ko‘paydi.

Ammo virus yangi-yangi chegaralarni zabt etishdan to‘xtamayapti. Xususan, Italiya Yevropada koronavirusning o‘chog‘iga aylandi. U yerda koronaviursga chalinganlar 323 nafarga, qurbonlar 11 nafarga yetdi. Italiyadan keyin virus bilan kasallanganlar Shveysariya, Avstriya, Xorvatiya, Jazoirda aniqlandi. Virus Lotin Amerikasiga kirib bordi. Mintaqadagi eng yirik davlat Braziliyada koronavirus bilan kasallanish qayd etildi.

Shuningdek, Janubiy Koreyada virus tarqalishi avj olyapti. Bu yerda 2019-nCoV`ga chalinganlar soni 1146 nafarga qurbonlar 12 nafarga yetdi.

Fransiya esa koronavirusni to‘liq bartaraf etganini e’lon qildi. Mamlakatda virusga chalingan 14 kishi davolanib, uyiga javob berildi.

Yangi koronavirus

Xitoyning Xubey provinsiyasi markazi Uxan shahrida o‘tgan yilning dekabr oyi o‘rtalarida yangi virus paydo bo‘ldi. Xitoy Hukumati 31 dekabr kuni Jahon Sog‘liqni saqlash tashkilotini mamlakatda epidemiya boshlangani haqida ogohlantirdi.

Koronavirus bilan kasallanganlar hozircha Xitoydan tashqari 41 davlat – Yaponiya, Tailand, Singapur, Janubiy Koreya, Gonkong, Avstraliya, Tayvan, Makao, Malayziya, AQSH, Germaniya, Vetnam, Fransiya, Birlashgan Arab Amirliklari, Kanada, Filippin, Buyuk Britaniya, Rossiya, Italiya, Hindiston, Finlyandiya, Shvetsiya, Shri-Lanka, Kamboja, Nepal, Ispaniya, Belgiya, Livan, Misr, Eron, Isroil, Iroq, Bahrayn, Afg‘oniston, Quvayt, Ummon, Braziliya, Xorvatiya, Shveysariya, Avstriya va Jazoirda aniqlandi.

JSST yangi koronavirusning dunyoga tarqalishi sababli Jamoat sog‘lig‘i uchun xalqaro xavotirga molik favqulodda vaziyat joriy qildi. Bu insoniyat sog‘lig‘i uchun jiddiy xavf tug‘ilganda e’lon qilinadigan rasmiy maqom hisoblanadi. JSST yangi koronavirusga rasman nom berdi va u COVID-2019 deb ataldi.

Koronavirus bugungacha qurbonlar soni bo‘yicha 2002 yildagi atipik pnevmoniya (SARS) va 2012 yildan beri Yaqin Sharq respirator sindromini (MERS-CoV) ortda qoldirdi. SARS`dan 8096 nafar odam kasallangan, shulardan 774 nafari (o‘lim darajasi 9,6 foiz) halok bo‘lgan. MERS-CoV virusidan 2494 nafar odam kasallanib, ularning 858 (o‘lim darajasi 34,4 foiz) nafari qurbon bo‘lgan.