Xoland uchun mavsum tugadimi? “Siti” bayonot berdi

“Manchester Siti” markaziy hujumchisi Erling Xoland Angliya kubogi chorak finalida “Bornmut”ga qarshi o‘yinda jarohat oldi va noma’lum muddatga safdan chiqdi.

Uchrashuv “shaharliklar”ning 2:1 hisobidagi g‘alabasi bilan yakunlandi. Norvegiyalik hujumchi o‘yinda gol urdi, ammo uchrashuv futbolchi uchun erta yakunlandi. Ikkinchi bo‘lim o‘rtalarida Xoland jarohati sabab maydonni tark etdi.

Tarmoqlarda Xoland stadionni qo‘ltiq tayoqda tark etgani aks etgan videolar tarqaldi. “Manchester Siti” Erlingning jarohati bo‘yicha dastlabki bayonotni berdi.

“Erling Manchesterda dastlabki tibbiy tekshiruvdan o‘tdi va hozirda jarohatning to‘liq darajasini tasdiqlash uchun mutaxassislar ko‘rigida bo‘lib turibdi. Yakuniy xulosalarni tez orada e’lon qilinadi. Xoland klublar o‘rtasidagi Jahon chempionatigacha safga qaytishi kutilmoqda”, deyiladi klub bayonotida.

Joriy mavsumda 24 yoshli norvegiyalik hujumchi “Manchester Siti” tarkibida 40 ta o‘yinda maydonga tushib, 30 ta gol urishga muvaffaq bo‘ldi.