Холанд учун мавсум тугадими? “Сити” баёнот берди

“Манчестер Сити” марказий ҳужумчиси Эрлинг Холанд Англия кубоги чорак финалида “Борнмут”га қарши ўйинда жароҳат олди ва номаълум муддатга сафдан чиқди.

Учрашув “шаҳарликлар”нинг 2:1 ҳисобидаги ғалабаси билан якунланди. Норвегиялик ҳужумчи ўйинда гол урди, аммо учрашув футболчи учун эрта якунланди. Иккинчи бўлим ўрталарида Холанд жароҳати сабаб майдонни тарк этди.

Тармоқларда Холанд стадионни қўлтиқ таёқда тарк этгани акс этган видеолар тарқалди. “Манчестер Сити” Эрлингнинг жароҳати бўйича дастлабки баёнотни берди.

“Эрлинг Манчестерда дастлабки тиббий текширувдан ўтди ва ҳозирда жароҳатнинг тўлиқ даражасини тасдиқлаш учун мутахассислар кўригида бўлиб турибди. Якуний хулосаларни тез орада эълон қилинади. Холанд клублар ўртасидаги Жаҳон чемпионатигача сафга қайтиши кутилмоқда”, дейилади клуб баёнотида.

Жорий мавсумда 24 ёшли норвегиялик ҳужумчи “Манчестер Сити” таркибида 40 та ўйинда майдонга тушиб, 30 та гол уришга муваффақ бўлди.