Qo‘zg‘olonchi Prigojinning Afrikadan daragi chiqdi (video)

“Vagner” xususiy harbiy kompaniyasi asoschisi Yevgeniy Prigojin Afrikadan videomurojaat yo‘lladi. Video kompaniyaga yaqin “Grey Zone” Telegram kanalida e’lon qilindi.

“Ishlayapmiz. Harorat +50 gradus. “Vagner” razvedka va qidiruv operatsiyalarini olib bormoqda. Rossiyani barcha qit’alarda yanada buyukroq, Afrikani esa yanada erkinroq qilmoqda”, degan Prigojin.

Uning aytishicha, hozirda “Vagner” ISHID, “Al-Qoida” va boshqa to‘dalarni “dahshatga solyapti”.

Prigojin “Vagner” o‘z oldiga qo‘yilgan va “erishishga va’da bergan” vazifalarni bajarishda davom etayotgani, shuningdek, kompaniya “qahramonlar”ni ishga olayotganini ta’kidlagan. 

Biroq “Vagner” rahbari Afrikaning qaysi davlatida ekani va jangchilari aynan qanday vazifalarni bajarayotganiga aniqlik kiritmagan.

Ma’lumot uchun, joriy yilning iyun oyi oxirida Prigojin “Vagner”ning ba’zi bo‘linmalari bilan Moskvaga qarshi qo‘zg‘olon ko‘targan. Qo‘zg‘olon kutilmaganda o‘z yakuniga yetgach, Prigojin qo‘shinlarining bir qismi bilan Belorusga ko‘chib o‘tdi. Keyinchalik Prigojin jangchilariga Afrikaga ko‘chib o‘tishga va’da bergani tasvirlangan video tarqaldi. “Vagner” jangchilari so‘nggi bir necha yil ichida Afrikaning bir qator mamlakatlarida bo‘lgan – ular foydali qazilmalarga imtiyozli kirish evaziga bir qator hukumatlarni qo‘llab-quvvatlagan. “Associated Press”ning xabariga ko‘ra, Nigerdagi davlat to‘ntarishi yetakchilaridan biri general Salifu Modi “Vagner” vakillari bilan uchrashgan. Uchrashuv tafsilotlari hozircha noma’lum