Qozog‘istonda qirqqa yaqin avtomobil to‘qnashib ketdi (video)

Qozog‘istonning Oqmo‘la viloyatidagi avtomobil yo‘lida qor bo‘roni va ko‘rishning yomonlashuvi tufayli 40 ga yaqin avtomobil bir-biriga to‘qnashib ketdi. Bu haqda viloyat IIB matbuot xizmati xabar berdi.

“Soat 13:30 da Oqmo‘la viloyatida, Birjan sal tumanidagi Ko‘g‘am qishlog‘i va Qoratol qishlog‘i o‘rtasida ob-havo sharoitining yomonlashishi (bo‘ron, ko‘rish imkoniyati cheklangan) tufayli 40 ga yaqin avtomashinaning to‘qnashuvi sodir bo‘lgan. Hozircha qurbonlar va jabrlanganlar haqida ma’lumot yo‘q”, deyiladi xabarda.

Ma’lum qilinishicha, voqea joyida politsiya va favqulodda xizmatlar faoliyat olib bormoqda. Avtomobillar evakuatsiya qilinib, yo‘l harakati xavfsizligi ta’minlanmoqda.

Eslatib o‘tamiz, o‘tgan yilning 10 dekabr kuni Turkiya janubi-sharqidagi Van viloyatida 30 ta mashina ishtirokida yirik yo‘l-transport hodisasi sodir bo‘lgandi. Hodisa oqibatida yo‘l to‘liq yopilgan. Shuningdek, voqea joyiga darhol sog‘liqni saqlash, jandarmeriya, politsiya, yong‘in-qutqaruv va yo‘l ishlari xodimlari ham yetib borgan.