Qoraqalpog‘istonda bemorga qaragan hamshira va uning qizi koronavirusga chalindi

Bugun, 7 aprel holatiga ko‘ra Qoraqalpog‘iston Respublikasida koronaviruska chalingan bemorlar soni 11 nafarga yetdi. Bu haqda Qoraqalpog‘iston SSV ma’lum qildi.

Vazirlik axborotiga ko‘ra, dastlab koronavirus aniqlangan Nukus shahrida yashaydigan bir erkak kishi va uning onasi bilan muloqatda bo‘lgan kishilar karantinga olinib, ulardan ham tahlillar olingan.

Tahlil natijalariga ko‘ra, afsuski, yana quyidagilarda koronavirus kasalligi aniqlangan:

•    erkak kishining ayoli va ularning ikki qizida;
•    erkak kishi bilan onasiga tibbiy yordam ko‘rsatgan hamshira va uning qizida;
•    erkak kishi bilan birga ishlaydigan erkak kishida;
•    Favqulodda vaziyatlar vazirligida xizmat safari bilan Toshkent shahridan kelgan 3 nafar erkak kishida.

Hozirda kasallanganlar Respublika yuqumli kasalliklar shifoxonasida davolanmoqda. Ularning ahvoli o‘rtacha darajada. Epidemiologik tekshirish ishlari davom etmoqda.

Eslatib o‘tamiz, O‘zbekistonda koronavirusni yuqtirib olish bilan bog‘liq ilk holat joriy yilning 15 mart kuni qayd etilgan edi. Ayni vaqtgacha koronavirusga chalinganlar 504 nafarga yetdi. Ularning 30 nafari davolandi, 2 nafari vafot etdi.

Qadrli yurtdoshlar, karantin davrida zarurat bo‘lmasa, ko‘chaga chiqmang. Vaqtni oilangiz, farzandlaringiz davrasida o‘tkazing. Unutmang, #UydaHayotBor