Midweek: Netanyaxuni “kuydirayotgan” Qatar pullari, Fransiya siyosatidagi “turkcha raqs”, Afg‘onistonga qalqon bo‘layotgan Mirziyoyev

BAAda uch nafar o‘zbekistonlik yahudiy ravvinni o‘ldirganlikda aybdor deb topilgan holda qatlga hukm qilindi.

Isroil Bosh vaziri Binyamin Netanyaxuning hukumati xavf ostida. Uning maslahatchilari Qatarga sotilganlik ayblovi bilan hibsga olindi. Tez orada navbat “G‘azo qassobi”ning o‘ziga kelishi mumkin.

Fransiya siyosiy davrasida “turkcha musiqa yangramoqda”. Parij sudi xuddi Turkiyadagi kabi prezidentlikka asosiy nomzodlardan biriga qamoq jazosi tayinladi.

O‘zbekiston Prezidenti Tojikistondagi tarixiy kelishuv va Samarqandda o‘tkazilayotgan muhim xalqaro sammit fonida “Euronews” nashriga intervyu berdi. 

Netanyaxuni “kuydirayotgan” Qatar pullari

Allaqandaydir rejimga aylanib ulgurgan Netanyaxu ustida so‘nggi paytda qora bulutlar paydo bo‘lgandi. Bugun bu bulutlar ancha quyuqlashdi. Isroilda “Qatargeyt 2” deya atalayotgan siyosiy mojaro avj oldi. Netanyaxuning odamlari Qatarga mo‘maygina pul evaziga sotilgani gumon qilinmoqda. BBC xabariga ko‘ra, so‘nggi kunlarda mamlakatda mazkur ish doirasida voqealar ancha qizigan. Xususan, 31 mart kuni kechqurun ushbu ish bo‘yicha Bosh vazir Binyamin Netanyaxu ham guvoh sifatida so‘roq qilingan. Qayd etilishicha, u Quddusdagi idorasida og‘ir jinoyatlarni tergov qilish bo‘limi xodimlari oldida ko‘rsatma bergan. Hozircha Netanyaxu bu ishda gumonlanuvchi emas, balki oddiy guvoh sifatida ishtirok etmoqda. 31 mart kuni politsiya uning ikkita asosiy yordamchisi – Jonatan Urix va Eli Feldshteynni hibsga olgan. Aynan ular asosiy gumonlanuvchilar hisoblanadi. Isroil manbalariga ko‘ra, Netanyaxu bergan ko‘rsatmalar sinchkovlik bilan tahlil qilinadi. Shundan so‘ng Bosh prokuratura Bosh vazirning ushbu ishdagi maqomini o‘zgartirishga asos bormi yoki yo‘q – shuni hal qiladi. Keng jamoatchilik orasida bu ishning “Qatargeyt 2” deb nomlanishining sababi esa amirlikning yaqin o‘tmishdagi korrupsion “sarguzashtlari”dir. Masalan, Yevropa Parlamentida 2022 yil dekabr oyida boshlangan siyosiy janjalda qit’adagi qator siyosatchilar, lobbistlar, davlat xizmatchilari va ularning oila a’zolaridan iborat guruh Qatar, Marokash va Mavritaniya hukumatlari ta’sirida bo‘lgan holda korrupsiya, pul yuvish va uyushgan jinoyatchilikka aloqador deya gumonlangan. Yakunda esa bu bo‘yicha ayrim mas’ullar o‘z aybiga iqror bo‘lgan. Yevroparlament deputatlari deyarli bir ovozdan bu ishning eng tepasida turganlardan biri deya korrupsiyada gumon qilingan spiker o‘rinbosari Yeva Kaylining vakolatlari muddatidan oldin tugatilishini yoqlab chiqdi. 

“Bu Yevroparlament tarixidagi eng yirik deb atalayotgan korrupsiya mojarosi – “Qatargeyt”ning yangi bosqichidir”, deb yozadi “Politico”. 

U futbol bo‘yicha 2022 yilgi jahon chempionatini tashkillashtirishda Qatar manfaatlariga xizmat qilishda ayblangan. Kayli chempionat uchun ob’ektlar qurilishida ishlagan muhojirlar huquqlarining muntazam buzilib kelishi bilan bog‘liq ayblovlar fonida amirlikka gard yuqtirmaslikni o‘z zimmasiga olgani aytiladi. Kaylidan tashqari, ishning yana kamida uch ishtirokchisiga nisbatan ham korrupsiya va pul yuvish kabi ayblovlar qo‘yilgan. Ular Yeva Kaylining sherigi Franchesko Jorji, Yevroparlament sobiq deputati Per Antonio Panseri, Xalqaro kasaba uyushmalari federatsiyasi bosh kotibi Luka Visentinilar edi. Umumiy hisobda esa “Qatargeyt” bo‘yicha o‘n kishi obdan tekshirilgan. Bu jarayonlar ishning umumiy kartinasi edi. Umuman olganda esa, so‘nggi yillarda Qatar o‘zining yuqori miqdordagi shov-shuvli korrupsion sxemalari va xalqaro maydondagi imiji borasida olib borgan shubhali harakatlari bilan dunyo hamjamiyatini lol qoldirib kelmoqda. Aslida 2022 yilgi futbol bo‘yicha Jahon chempionatining eng mavsum uchun eng noqulay paytda bo‘lishiga qaramay, qish kuz oxiri va qish kunlari Qatarda o‘tkazilishining o‘zi ko‘p narsadan darak beradi. FIFA klublar yoki terma jamoaning manfaatlarini chetga surgan holda, necha yillardan buyon bir tekisda buzilmay kelayotgan o‘zgarmas taqvimni chetga surganining o‘zi ajablanarli edi.

Bugun esa shunga o‘xshash g‘avg‘olar bir yarim yildan buyon insoniyat tarixidagi eng qonli qirg‘inlardan birini olib borayotgan yahudiy davlati bilan sodir bo‘lmoqda. Bu jinoyatning tashkilotchilaridan biri bo‘lgan Netanyaxuga yaqin odamlar ayni damda Dohada ro‘yxatdan o‘tgan xalqaro firma orqali Qatar manfaatlarini mamlakat ichida ilgari surgan bo‘lishi mumkinligi aytilyapti. Tergovga ko‘ra, mazkur ishning eng yuqorisida Eli Feldshteyn turgan. U Dohada ro‘yxatdan o‘tgan xalqaro firma orqali olingan pullarni Isroil matbuotida Qatar imijini yaxshilovchi materiallar tarqatish va amirlikning biznes loyihalarini Isroil investorlariga jozibali ko‘rsatishga sarflagan. Oradan biroz vaqt o‘tib, bu jinoiy sxemaga Bosh vazirning boshqa yuqori martabali maslahatchisi Jonatan Urix ham jalb qilingan. Ular 31 mart kuni hibsga olingan. Joriy yilning mart oyida politsiya Feldshteyn va Urixni xorijiy agentlar bilan aloqalar, firibgarlik, pul yuvish va poraxo‘rlikda gumon qilib so‘roq qilgan. Sud maxfiy ma’lumotlarni oshkor etishni taqiqlagani uchun boshqa tafsilotlar noma’lum. Urix va Feldshteyn bilan bir qatorda, ushbu ish doirasida Netanyaxuning “Likud” partiyasi saylovoldi kampaniyasining sobiq bosh maslahatchisi Isroil Eynxorn ham tergov qilinmoqda. Tergovga turtki bo‘lgan narsa esa isroillik tadbirkor Gil Birger tomonidan e’lon qilingan yozuvlar edi. Uning so‘zlariga ko‘ra, u Feldshteynga Qatar hukumati lobbisti orqali pul o‘tkazishda yordam bergan. Bosh prokuratura aynan shu ma’lumot asosida tergovni boshlab yuborgan. Bu ish doirasida bir nechta jurnalistlar ham so‘roq qilingan. Ulardan biri Qatarning lobbistlari bilan to‘g‘ridan to‘g‘ri aloqada bo‘lganlikda gumon qilinmoqda.

Biroq ushbu mojaro qizigan paytda Netanyaxu va uning atrofidagilar barcha ayblovlarni rad etyapti. Ular jim tura olishmayapti va ayni damda juda bezovta ham. Chunki “G‘azo qassobi” tergovni to‘xtatish uchun qo‘ldan kelgancha harakat qilyapti. Jumladan, 21 mart kuni u Isroil kontrrazvedkasi rahbari Ronen Barni ishdan bo‘shatdi. Bunday qarorga esa o‘z-o‘zidan kelinmagani aniq. Sabab shuki, hozirda aynan kontrrazvedka Netanyaxu maslahatchilarining Qatar bilan qay darajada “osh-qatiq” bo‘lganini tekshiryapti. Bunday sharoitda esa aynan shu tuzilmaning rahbarini yo‘ldan olish “cho‘kayotganda xasga tayanish”dan boshqa narsa emas. Biroq Netanyaxu kontrrazvedka rahbari Ronen Barning ishdan bo‘shatilishini 2023 yil 7 oktyabrda HAMAS hujumining oldini ololmagani va ishonchni yo‘qotgani bilan bog‘liq deb e’lon qildi. Ammo u “chuchvarani xom sanagan ko‘rinadi. Chunki Isroil Oliy sudi siyosiy motivga egaligi aniq va ravshan bo‘lib turgan bu qarorni bekor qildi. Netanyaxu esa allaqachon kontrrazvedkaning hozircha faqat o‘zi uchun “qonuniy” bo‘lgan yangi rahbarini e’lon qilgan. Bu esa bugun yahudiy davlati boshqaruvida anchayin jiddiy disbalans borligidan dalolatdir. Bu ham yetmagandek, Bosh prokuror Gali Baxarav-Miarani ishdan chetlatish jarayoni esa yanada katta janjalga sabab bo‘ldi. Shubha-gumonlarni haddan ziyod orttirgan jihat shuki, aynan Baxarav-Miara shu yilning fevral oyi oxirida “Shin-Bet” va politsiyaga “Qatargeyt 2” bo‘yicha tergov boshlashni topshirgan edi. Yuqorida ta’kidlanganidek, Netanyaxu ayni damda xasga ham yopishmoqda. U va uning atrofidagilar vaziyatdan chiqish yo‘llarini axtaryapti. Biroq u uchun endi yo‘l emas, balki faqat tor, tiqilinch va qorong‘i yo‘laklargina qolgan bo‘lishi mumkin.

Fransiyaga ko‘chgan “turkcha ssenariy”

Mazkur hafta boshida Turkiyada davom etayotgan siyosiy mojaroning fransuzcha versiyasi avj oldi. Yaqindagina Turkiyada prezidentlikka asosiy nomzodlardan biri bo‘lgan muxolifat a’zosining qamalishini “xavotir” bilan qarshi olgan Fransiyaning o‘zida ham endi shunday holat. Parij sudi mamlakatdagi o‘ta o‘ng “Milliy birlashuv” partiyasi yetakchisi, amaldagi prezident Emmanuel Makronning eng asosiy raqibi bo‘lib kelgan Marin Le Penni to‘rt yilga ozodlikdan mahrum qildi. Shundan ikki yili shartli, qolgan ikki yil davomida u elektron bilaguzuk taqishi kerak bo‘ladi. Bundan tashqari, unga 5 yil davlat lavozimlarida ishlash taqiqlandi. Oxirgi sanksiya sud qarori e’lon qilingandan so‘ng darhol kuchga kiradi. Buni Le Penning apellyatsiya arizasini topshirishi ham to‘xtatib qololmaydi. U bilan bir qatorda “Milliy birlashuv” partiyasining yana sakkiz nafar a’zosi talon-toroj ishi bo‘yicha aybdor deb topilgan. Bu ishning tarixi esa juda uzun va u bo‘yicha olib borilgan tergovning tagi naqd 2015 yilga borib taqaladi. Le Penga chiqarilgan hukm esa asosan o‘tgan yilgi harakatlarda aks etogandi. Jumladan, 30 sentyabr kuni Parij jinoiy sudida Marin Le Pen boshchiligidagi Fransiyaning o‘ta o‘ngchi “Milliy birlik” rahbariyatiga nisbatan sud jarayoni boshlandi. Le Pen va boshqa 20 dan ortiq partiya vakillari Yevropa Ittifoqi mablag‘larini o‘zlashtirganlikda va Yevroparlament deputatlarining yordamchilarini yollash orqali partiyani yashirincha moliyalashtirganlikda ayblanayotgandi. Ushbu ayblov uchun Le Pen maksimum o‘n yilgacha ozodlikdan mahrum qilinishi mumkin edi. Umumiy zarar esa deyarli 7 million yevroga baholangan. Ayblov xulosasiga ko‘ra, Le Pen partiyasidan Yevroparlament deputatlariga yordamchi sifatida yollangan odamlar aslida Yevropa Ittifoqidagi vakillari uchun emas, balki shaxsan Le Pen yoki uning partiyasi uchun ishlagan. Gap shundaki, Terri Legening “yordamchilari” dan biri partiya asoschisi Jan-Mari Le Penning qariyb yigirma yil davomida qo‘riqchisi bo‘lgan, keyin u Marin Le Penni ham qo‘riqlagan.

Shu tariqa 13 noyabrga kelib, Parij prokuraturasi ultra o‘ngchi “Milliy birlik” partiyasining parlamentdagi fraksiyasi rahbari Marin Le Penni Yevroparlament mablag‘larini noto‘g‘ri yo‘naltirganlikda ayblab, besh yillik qamoq jazosiga hukm qilishni so‘radi. Prokurorlar partiyani ikki million yevro jarimaga tortishni ham istagandi. Le Penning o‘zi esa o‘shanda prokurorlarni “fransuzlarni o‘zlari xohlagan kishiga ovoz berish imkoniyatidan mahrum qilish”da aybladi. Bugunga kelib nihoyat uzoq yillik ish yakunlandi, Le Penga nisbatan tegishli hukm ham chiqdi. Ammo yuqorida ta’kidlanganidek, Turkiyada ro‘y berayotgan ichki siyosiy mojaroning nusxasi endilikda Fransiyada ham paydo bo‘ldi. Chunki to‘rt yillik qamoq jazosiga hukm qilingan va besh yilga davlat lavozimlarida ishlash taqiqlangan Marin Le Pen sud qaroriga qaramay, Fransiya prezidentligiga nomzodini qo‘yish niyatida. 31 mart kuni millatchi siyosatchi Fransiya telekanallaridan biriga bergan intervyusida o‘zining jangchi ekani va uni yo‘q qilishlariga yo‘l qo‘ymasligini ta’kidladi. Suhbat davomida u “hech qanday sharoitda” siyosatni tark etmasligini ham aytgan. Marin Le Pen sud qarorini siyosiy va noqonuniy deb hisoblamoqda. U xuddi Turkiyadagi muxolifatchilar kabi “sud avtoritar usullardan foydalanyapti”, deya jar soldi.

Shu o‘rinda Le Pen xonimning so‘nggi yillardagi siyosiy faoliyatiga qisqacha to‘xtalib o‘tsak. Tan olib aytish joizki, u oxirgi prezidentlik saylovlarida asosiy favoritlardan biri bo‘ldi. Xususan, 2022 yilgi saylovlarda u birinchi turda 23,15 foiz ovoz olgan. “Milliy birlik” partiyasidan prezidentlikka nomzod sifatida ko‘rsatilgan o‘ngchi siyosatchi o‘sha saylovning ikkinchi turida mamlakatning amaldagi Prezidenti Emmanuel Makronga qarshi kurashib, 41 foizdan biroz ko‘proq ovoz to‘plagan holda mag‘lub bo‘lgandi. Biroq ayni paytdagi ommaviy so‘rovlarga ko‘ra esa, Le Penning imkoniyatlari Fransiyadagi prezidentlik poygasida juda yuqori. Jumladan, mart oyi oxirida Fransiya jamoatchilik fikri instituti tomonidan o‘tkazilgan tadqiqot uning reytingini 37% gacha baholagan. Mamlakat tashqarisida ham uni hukumatlar darajasida qo‘llayotganlar yetarlicha. Masalan, sud hukmidan keyin Italiya Bosh vaziri o‘rinbosari Matteo Salvini, Vengriya Bosh vaziri Viktor Orban va Niderlandiyaning o‘ng qanot “Ozodlik” partiyasi rahbari Gert Vilders Marin Le Penni qo‘llab-quvvatlashini bildirgan. Yuqorida nomlari keltirilganlarning aksari o‘ng hukumat vakillari ekani hisobga olinsa, tez orada bu hukmga Yevropadagi millatchi partiyalarni jon-jahdi bilan himoya qilishga urinayotgan Tramp ma’muriyati ham o‘z e’tirozlarini bildirib o‘tsa ajab emas.

Mirziyoyevning intervyusi

O‘zbekiston Prezidenti Shavkat Mirziyoyev dunyoning nufuzli OAVlaridan biri hisoblanadigan “Euronews”ga eksklyuziv intervyu berdi. Davlat rahbari ko‘plab mamlakatlar “Tolibon” muvaqqat hukumati bilan hamkorlik qilishdan o‘zini tiyib turgan bir paytda O‘zbekiston janubiy qo‘shnisi bilan faol aloqalarni davom ettirayotganining sabablarini ochiqladi.

“Biz hech qachon qo‘shnimizdan yuz o‘girmaganmiz, u bilan aloqalarni uzmaganmiz. Biz qo‘shni davlatlar, jumladan, uning yaqin va eng muhim hamkori sifatida O‘zbekiston bilan konstruktiv hamkorlik qilmasdan Afg‘onistonni rivojlantirish imkonsiz, degan fikrga doim ishonib kelganmiz”, dedi Prezident.

Mirziyoyev Afg‘onistonga nisbatan olib borayotgan siyosatini qo‘llab-quvvatlamaganlarning ko‘pchiligi bugun uning to‘g‘riligi, muqobili yo‘qligini tan olishga majbur bo‘layotganini ta’kidladi. U shuningdek, “Tolibon”dan oldingi Ashraf G‘ani boshchiligidagi ma’muriyat mamlakatni boshqarishga yaroqsizligi va bir kun kelib qulashi oldindan ma’lum bo‘lganini aytdi.

 “Afg‘onistondagi avvalgi tuzum bir qator sabablarga ko‘ra hokimiyatni saqlab qololmasligiga amin edik. Bu sabablar qatorida avvalgi hokimiyatning mamlakat hududini to‘liq nazorat qilishga qobilsizligi, muxolifat bilan muloqotga tayyor bo‘lmagani, inklyuziv hukumatni shakllantirishga intilmagani va davlat boshqaruvining barcha darajalarida korrupsiya avj olganini keltirish mumkin”, dedi u.

O‘zbekiston yetakchisi hozirgi rahbariyat Afg‘onistondagi vaziyatni barqarorlashtirishga, o‘z resurslarini aeroportlar, ichki temiryo‘l tarmoqlari, suv-energetika infratuzilmasini rivojlantirish va ko‘knor maydonlarini qisqartirishga yo‘naltirayotganini ta’kidlagan. BMT ma’lumotlariga ko‘ra, “Tolibon” 2023 yilda giyohvand moddalar savdosini taqiqlaganidan so‘ng, Afg‘onistonda ko‘knor yetishtiriladigan yerlar 95 foizga kamaygan. Prezident Mirziyoyevning so‘zlariga ko‘ra, Afg‘onistonda ko‘knordan xoli kelajak barpo etish maqsadida qishloq aholisiga yordam ko‘rsatilmoqda, qishloq xo‘jaligining muqobil yo‘nalishlari rivojlantirilyapti. Shuningdek, u O‘zbekiston Afg‘onistonga nafaqat mavjud inqirozdan chiqish, balki uzoq muddatli rivojlanish imkonini beradigan ijobiy kun tartibi va tashabbuslarni ilgari surish uchun Yevropa Ittifoqi va boshqa xalqaro hamkorlar bilan birgalikda ishlashga tayyor ekanini bildirdi. O‘zbekiston Prezidenti hozirda birinchi galdagi vazifa – Afg‘onistonga ta’lim sohasida yordam berishni davom ettirish ekanini ham qo‘shicha qilgan. 

Masalan, 2023 yil 24 noyabr kuni Ozarbayjon poytaxti Baku shahrida o‘tgan Birlashgan Millatlar Tashkilotining Markaziy Osiyo iqtisodiyoti uchun maxsus dasturi doirasidagi sammitda xalqaro hamjamiyatni Afg‘onistondagi “Tolibon” hukumati bilan muloqot o‘rnatishga chaqirgandi. Ozarbayjonda bo‘lib o‘tgan o‘sha sammitda Mirziyoyev Afg‘onistondan vakil ishtirok etmaganiga ijobiy baho bermagandi. U bugungi Afg‘onistonni o‘z muammolari bilan yakka qoldirish mumkin emasligi, amaldagi hukumat bilan xalqaro muloqot o‘rnatilmasa, hech qanday o‘zgarishlarga erishib bo‘lmasligi haqida ogohlantirgan. Shundan so‘ng, oradan ko‘p o‘tmay, aniqrog‘i 2024 yili fevral oyida O‘zbekiston Afg‘oniston elchixonasini “Tolibon” diplomatlariga topshirgan edi. Afg‘onistonni xalqaro va mintaqaviy doiralarda qo‘llab-quvvatlash keyinchalik ham to‘xtab qolgani yo‘q. Xususan, o‘tgan yil 5-6 iyul kunlari Ozarbayjonning Shusha shahrida o‘tkazilgan Turkiy Davlatlar Tashkilotining norasmiy sammitida Mirziyoyev O‘zbekiston o‘zining janubiy chegaradoshi bo‘lgan Afg‘onistonni qo‘llab-quvvatlashini yana bir bor tasdiqladi. Davlat rahbari o‘shanda Afg‘onistonning chet elda muzlatilgan aktivlari qaytarilishi lozimligini ham qo‘shimcha qilgandi. Avgust oyida esa O‘zbekiston Bosh vaziri Abdulla Aripov Afg‘onistonning Qobul shahriga bordi. Tashrif doirasida O‘zbekiston hamda “Tolibon” muvaqqat hukumati rahbariyati o‘rtasida 5 ta shartnoma imzolandi. Joriy yil 22 fevral kuni esa Toshkent shahrida O‘zbekiston Bosh vaziri Abdulla Aripov “Tolibon” muvaqqat hukumatining bosh vaziri o‘rinbosari vazifasini bajaruvchi Mulla Abdulg‘ani Barodar bilan ikki tomonlama muzokaralar o‘tkazgandi. 

Dor ostidagi uch o‘zbek

BAAda 3 nafar O‘zbekiston fuqarosi yahudiy ravvinni o‘ldirganlikda ayblanib, qatlga hukm qilindi. O‘zbekiston TIV ham QALAMPIR.UZ so‘roviga javoban buni tasdiqladi. Esingizda bo‘lsa, o‘tgan yil noyabr oyida Birlashgan Arab Amirliklarida Isroil va Moldova fuqarosi bo‘lgan ravvin Svi Koganning o‘ldirilishiga aloqadorlikda gumonlanib, uch nafar O‘zbekiston fuqarosi hibsga olingandi. Shundan so‘ng, 26 noyabr kuni O‘zbekiston Tashqi ishlar vaziri Baxtiyor Saidov TIV binosida Isroilning O‘zbekistondagi elchisi Gideon Lustig bilan uchrashdi va Birlashgan Arab Amirliklari hududida yahudiy ravvinning o‘ldirib ketilgani yuzasidan hamdardlik bildirdi. Saidov terrorizm va ekstremizmning chegarasi va millati yo‘qligini aytib, O‘zbekiston hukumati tergov jarayonlarida BAA va Isroil idoralari bilan yaqindan hamkorlik qilayotganini bildirgandi. Ish yuzasidan olib borilgan tergovlardan so‘ng, sudlanuvchilar jabrlanuvchini kuzatib, o‘ldirganini aniqlagan. Bu orada ularga yordam bergan yana bir shaxs borligi ma’lum bo‘lgan. Ravvinning o‘limida ayblanib, qo‘lga olingan o‘zbekistonliklar 28 yoshli Olimboy Tohirovich va Mahmudjon Abdulrahim hamda 33 yoshli Azizbek Komilovich ekani aytilgan edi. Biroq ularga yordam berishda ayblanib, umrbod qamoq jazosiga hukm qilingan 4-sudlanuvchining shaxsi va fuqaroligi ochiqlanmagan. Keyinchalik, joriy yil 25 noyabrda Bosh prokuror Hamad Saif Al Shamsi ushbu to‘rt nafar ayblanuvchini sudga olib kelishni buyurgan. Bildirilishicha, Davlat xavfsizlik prokuraturasi tomonidan sudga taqdim etilgan dalillar sudlanuvchilarning qotillik va odam o‘g‘irlash jinoyatlarini batafsil tan olishlari, sud-tibbiy ekspertiza xulosalari, o‘limdan keyingi ekspertiza xulosalari, jinoyatda qo‘llanilgan asboblar tafsilotlari va guvohlarning ko‘rsatmalaridan iborat. Birlashgan Arab Amirliklari qonunchiligiga ko‘ra, o‘lim jazosi hukmlari avtomatik ravishda apellyatsiya qilinadi va ko‘rib chiqish va qaror qabul qilish uchun Federal Oliy sudning Jinoyat ishlari bo‘limiga yuboriladi. Bosh prokuror Siaf Al Shamsining ta’kidlashicha, hukm Birlashgan Arab Amirliklarining terrorizmga qarshi kurashda adolatning eng yuqori standartlari va qonun ustuvorligi hamda adolatli sudlov kafolatlarini ta’minlash borasidagi sodiq majburiyatini aks ettiradi. Uning so‘zlariga ko‘ra, BAA sud tizimi milliy xavfsizlik va barqarorlikka putur yetkazishga qaratilgan har qanday urinishlarga qat’iy qarshi turadi. Prokuror shuningdek, amirlikda birgalikda yashash va bag‘rikenglikning global modeli bo‘lib, uning qonunlari diniy va etnik mansubligidan qat’i nazar, barcha aholini himoya qilishi hamda ularning xavfsizligini ta’minlashini ham eslatib o‘tgan.