Johnson & Johnson vaksinasi bo‘yicha tergov boshlandi

Amerikaning Johnson & Johnson korporatsiyasi ma’muriyati o‘zining koronavirusga qarshi vaksinasi sinovlarini bir necha kun ichida yana qayta boshlashga umid qilyapti. Bu haqda kompaniyaning moliyaviy direktori Jozef Uolk aytib o‘tgan. 

Avval xabar berganimizdek, kompaniya vakillari 12 oktyabr kuni ko‘ngillilardan birining ahvoli yomonlashgani sababli sinovlar to‘xtatilganini e’lon qilishdi. 

Uolkning so‘zlariga ko‘ra, voqea yuzasidan "mustaqil qo‘mita" tergov boshlagan. Uning ta’kidlashicha, tergov hanuzgacha davom etmoqda. Moliyaviy direktor tadqiqotlar bir necha kungagina to‘xtatilganiga umid bildirgan. 

Kompaniya vaksina borasidagi ishlar 2021 yil boshiga qadar tugashiga ishonmoqda. Johnson & Johnson 2021 yil oxiriga qadar 1 milliarddan ortiq dozada vaksina ishlab chiqarishni rejalashtirmoqda.

Ma’lumot uchun, kompaniya tomonidan ishlab chiqilgan yangi koronavirusga qarshi vaksina klinik sinovlarining birinchi davri va ikkinchi davrining birinchi bosqichi muvaffaqiyatli o‘tgandi. Ko‘ngillilarda barqaror immunitet shakllangandi.