“Johnson & Johnson” коронавирусга қарши вакцина синовлари бошлади

Американинг "Johnson & Johnson" компанияси кеча, 23 сентябрь куни ўзининг коронавирусга қарши вакцинаси клиник синовларининг учинчи босқичини бошлади.

"Компания COVID-19 вакцинаси учун халқаро ўрганишнинг учинчи босқичи бошланганини эълон қилди", дейилган компаниянинг матбуот хабарномасида. 

Таъкидланишича, тадқиқотга уч қитъадаги саккизта мамлакатдан 60 минг нафар кўнгиллилар жалб қилинади. Компания, агар вакцина ўзининг самарадорлиги ва хавфсизлигини исботласа, биринчи партия 2021 йил бошида сертификатлаш учун тақдим этилади, деб умид қилмоқда.

АҚШ ҳукумати "Johnson & Johnson" компаниясига вакцина ишлаб чиқариш учун 456 миллион доллар ажратган.АҚШ маъмурияти шу каби лойиҳаларга, умумий ҳисобда 12 миллиард доллар сармоя киритган.

Эслатиб ўтамиз, АҚШ маъмурияти мамлакат аҳолисини коронавирусга қарши эмлаш режасини тайёрлаганини маълум қилганди. Ушбу жараён жорий йилнинг октябрь ойи ўрталарида ёки ундан сал ўтиб бошланиши режалаштирилган.