Italiyada katta shahar jarlik yoqasida qolmoqda

Sitsiliyaning Nishemi shahri bir necha kundan beri tubsizlik yoqasida turibdi. Bu haqda “The Guardian” xabar berdi.

Ma’lum bo‘lishicha, shaharning 25 ming aholisi bir necha kun davomida 25 metrlik tubsizlik yoqasida yashab kelmoqda. 25 yanvar kuni Garri sikloni olib kelgan kuchli yomg‘irdan so‘ng vayronkor ko‘chki shaharning butun yonbag‘rini vayron qilgan va 4 kilometr uzunlikdagi jarlikni hosil qilgan.

Oqibatda yo‘llar qulab tushgan, mashinalarni yer yutib yuborgan va shahar tuzilishining butun bir qismi vodiyga tushib ketgan. O‘nlab uylar ko‘chki chetida xavfli tarzda osilib turibdi.

Rasmiylar hozirgacha 1600 dan ortiq odamni evakuatsiya qilgan. Tarixiy markazning butun bir qismi istalgan vaqtda pastga siljishi mumkin va XXVII asr cherkovlari xavf ostida qolgan.

Mutaxassislarning fikriga ko‘ra, Nishemidagi ko‘chki iqlim favqulodda holati O‘rta yer dengizini qanday o‘zgartirayotganining so‘nggi belgisidir. Bu yerda o‘nlab yillar davomida nuqsonli qurilish siyosatiga befarqlik va nazoratdan tashqaridagi urbanizatsiya modeli sabab deb ko‘rsatilgan.

O‘tgan yilning noyabr oyida e’lon qilingan milliy statistika agentligi hisobotiga ko‘ra, Italiyada qurilgan har 100 ta yangi uyning 15 tasida zarur ruxsatnomalar yo‘q. Italiya atrof-muhitni muhofaza qilish assotsiatsiyasiga  ko‘ra, bir  asrdan ko‘proq vaqt ichida 14 mingdan ortiq joyda 17 mingga yaqin yirik ko‘chkilar qayd etilgani oqibatida deyarli 6 ming kishining o‘limiga sabab bo‘lgan.

Ma’lumot uchun, 1998 yilda Italiyaning eng halokatli ko‘chkilaridan biri janubiy Kampaniya mintaqasidagi Sarno shahrida sodir bo‘lgan. O‘shanda bir necha kun davom etgan kuchli yomg‘irdan keyin butun tepaliklar qulab tushgan va 160 kishi halok bo‘lgan. Keyinchalik o‘tkazilgan tergovlar natijasida, ko‘plab uylar beqaror qiyaliklarda noqonuniy ravishda qurilgani aniq bo‘lgan.

Eslatib o‘tamiz, avvalroq Misrda yerning cho‘kishi oqibatida chuqurligi 15 metr bo‘lgan ulkan o‘ra hosil bo‘lib, ikki do‘kon butunlay yer ostiga qulab tushgani haqida xabar berilgandi.

Javohir Aliqulov