Ilhom Aliyev Qozog‘istonga keldi

Bugun, 10 aprel kuni Ozarbayjon Prezidenti Ilhom Aliyev Qozog‘istonga rasmiy tashrif bilan keldi. Bu haqda Akorda matbuot xizmati xabar berdi.

Ozarbayjon rahbarini aeroportda Qozog‘iston Bosh vaziri Alixan Smailov kutib olgan. Bugun u Qozog‘iston Prezidenti Qosim-Jomart To‘qayev bilan tor va kengaytirilgan tarkibda uchrashishi rejalashtirilgan. Kun tartibidan ikki davlat o‘rtasidagi strategik sheriklikni rivojlantirishning asosiy masalalari o‘rin olgan.

Ma’lumot uchun, Aliyev o‘tgan yilning oktyabr oyida Osiyoda hamkorlik va ishonch choralari bo‘yicha kengashning VI sammiti va MDH davlatlari rahbarlari kengashi yig‘ilishida ishtirok etish uchun Ostonaga kelgan. Prezidentlar o‘rtasidagi muloqot doirasida Qosim-Jomart To‘qayev Ozarbayjon rahbariga Qozog‘iston poytaxtidagi Haydar Aliyev ko‘chasi yanada munosibroq joyga ko‘chirilishini aytgan. O‘z navbatida Ilhom Aliyev To‘qayevga otasi xotirasiga hurmat bilan munosabatda bo‘lgani uchun minnatdorlik bildirgan.