G‘arb Rossiyani tiz cho‘ktira olmaydi – Rossiya TIV

Rossiya Tashqi ishlar vaziri o‘rinbosari Sergey Ryabkovning aytishicha, G‘arb Rossiyani tiz cho‘ktira olmaydi. Bu haqda RIA Novosti xabar berdi.

“Bizning xavfsizlik bo‘yicha takliflarimiz rad etildi, bu g‘oyalarning asosiy elementlari e’tiborga olinmadi. Oqibatda bizda boshqa tanlov qolmagan edi. G‘arbning Rossiyani tiz cho‘ktirish haqidagi illyuziyalari ayanchli tarzda tugaydi. Ular Rossiyani tiz cho‘ktira olmaydi”, deydi Tashqi ishlari vazirligi rasmiysi.

Diplomat Amerika Qo‘shma Shtatlari bilan munosabatlarni sharhlar ekan, vaziyat Rossiya bilan AQSH munosabatlarining uzilishiga olib kelayotganini qayd etdi.

“AQSH ishni aloqalarni uzish sari yetaklamoqda, bunga hech qanday shubha yo‘q. Biz muloqot janrini hech bo‘lmaganda elementar jihatlarda normallashtirish zarurligini ta’kidlaymiz”, deydi vazir o‘rinbosari.

Avvalroq, Sergey Ryabkov Rossiya NATOni munosabatlarning yanada keskinlashishiga olib kelishi mumkin bo‘lgan qadamlardan ogohlantirgan edi.

Rossiya-Ukraina urushi

Joriy yilning 21 fevral kuni Rossiya Prezidenti Vladimir Putin Kremlda Ukraina sharqidagi o‘zini mustaqil deb e’lon qilgan Lugansk xalq respublikasi (LXR) va Donetsk xalq respublikasini (DXR) tan olish to‘g‘risidagi farmonni imzoladi. Keyinroq RF respublikalarni shu nomdagi viloyatlar chegaradagi tan olganini ta’kidlab, Ukrainaga qarshi urush xavfini oshirib yubordi.

Putinning favqulodda qarori ortidan AQSH, YeI, Kanada, Avstraliya, Buyuk Britaniya va Yaponiya rasmiylari ham Rossiyaga qarshi sanksiyalar kiritdi.

24 fevral kuni Rossiya Prezidenti Vladimir Putin Ukraina sharqida Donbassda rus harbiylari "maxsus harbiy operatsiya" boshlaganini e’lon qildi va rus qo‘shinlari Ukrainaga hujum boshladi. Putin bu harakatini Ukraina sharqidagi rossiyaparast separatist kuchlar rahbarlari shunday so‘rov yuborgani bilan oqladi.

Bundan avvalroq Zelenskiy Rossiya fuqarolariga rus tilida murojaat qilib, ukrainlarga “na sovuq, na issiq, na gibrid urush kerak emas”ligini, ukrainlar hujumchilarni kutib olishga tayyorligini bildirgandi. Ko‘p o‘tmay Prezident Rossiya bilan diplomatik aloqani uzdi. Prezident Zelenskiy mamlakatda harbiy holat e’lon qildi.

25 fevral kuni Zelenskiy Ukrainada umumiy harbiy safarbarlik e’lon qildi. Armiyaga chaqiruv mamlakatning qator viloyat va shaharlarida amalga oshirilishi belgilandi.

Rus qo‘shinlari hozirgacha Ukrainaga shimol, sharq va janubdan hujum qilib kelmoqda va qator hududlarni egallashga erishdi. Ammo bu urush Rossiyaning dunyoda yakkalanib qolishiga olib keldi.

Ukrainaga hujum boshlanishi Rossiya iqtisodiga og‘ir zarba berdi. Rus kompaniyalari aksiyalari keskin arzonlashdi, Moskva birjasida savdolar mislsiz darajada pasayish bilan o‘tdi. Gazprom, LUKOYL va boshqa yirik kompaniyalar yo‘qotishlarga uchradi.

Hujum boshlangach, Yevropa davlatlari va AQSH Rossiyaga qarshi bir necha bosqichli sanksiyalar joriy qildi. Rossiyaning VTB, “Rossiya” banki, “Otkritiya”, “Novikombank”, “Promsvyazbank”, “Sovkombank” va VEB.RF banklari SWIFT xalqaro banklararo tizimidan uzildi. AQSH va Yevropa Ittifoqi Rossiyaning oltin-valyuta zaxirasini blokladi.

Yevropa davlatlari, AQSH, Kanada Rossiya uchun o‘z havo hududini yopdi. Bu sanksiyalarga neytral davlat hisoblangan Shveysariya ham qo‘shildi. Urush fonida Ukrainani Yevropa Ittifoqi a’zoligiga qabul qilish jarayoni tezlashdi.