Finlyandiyada muxlislar klub stadionini yoqib yubordi (video)

Finlyandiyadagi tarixiy “Haka” futbol klubi stadionining tribunasi uch nafar o‘smir tomonidan qasddan yoqib yubordi. Bu voqea Finlyandiyaning eng qadimgi futbol stadionlaridan birida sodir bo‘lib, butun dunyo muxlislarini hayratda qoldirdi. Bu haqda “News9” nashri xabar berdi.

Manbaga ko‘ra, voqea joriy yilning 7 dekabr kuni klub mamlakatning oliy ligasidan tushib ketganidan bir necha hafta o‘tib sodir bo‘lgan. Oqibatda “Tehtaan Kentta” stadionining 400 o‘rinli yog‘och tribunasi yong‘inda jiddiy zarar ko‘rgan.

Mahalliy politsiya tergoviga ko‘ra, yong‘in paytida uch nafar voyaga yetmagan bola voqea joyida bo‘lgan va ularning barchasi 15 yoshdan kichik. Ulardan biri yong‘inni boshlaganini tan olgan, ammo Finlyandiya qonunchiligiga ko‘ra, voyaga yetmaganlarni jinoiy javobgarlikka tortish mumkin emas.

Detektiv inspektor Maijastiina Tammisto bayonotida ish tergov ostida ekanligini tasdiqlagan. U shuningdek, voyaga yetmaganlar uchun huquqiy oqibatlar turlicha bo‘lishi mumkinligini, biroq Finlyandiyada bolalarga kompensatsiya majburiyati hali ham qo‘llanilishi mumkinligini aytgan. 

“Haka” klubi raisi Marko Laaksonenning aytishicha, klub hozircha zarar miqdorini aniqlamagan, ammo u jiddiy bo‘lishi kutilmoqda. Klub allaqachon moliyaviy yo‘qotishlar va quyi ligaga tushib ketishdan aziyat chekmoqda, hodisa esa vaziyatni yanada og‘irlashtirgan. 

Hozirda “Haka” klubi stadionni yana o‘yinlarga yaroqli qilish uchun tayyorgarlik ishlarini boshlagan.